33. De sancto Augustino.

1. Sancte confessor,
Augustine,
doctor egregie,
lucerna
fervens luce vitae,

2. Luce tua fides
irradiatur

quaerentium Deum,
quem facie ad faciem
beati mundo
corde videbunt.

3. Eloquia Dei
emanant per te
velut aqua fontis
cum impetu de vertice
montis excelsi
scaturientis.

4. Te quondam Romam
tua profectum genetrix
insecuta
baptismi
te renasci fonte
petiit lacrimans.

5. Quos tandem fletus

Deus clemens exaudivit ;

Mediolani

nam fide

plenum baptizavit

sanctus Ambrosius.

6. Mox reformandam
vitam apostolicam
regularibus praeceptis
vestigans

vivendi clericis formam
praescripsisti,

7. Tuque librorum
ecclesiasticorum
loca nubila illustrans
errores

scripturis plurimis sanctis
exemisti.

8. Tu spoliatis
egrediens
vasis Aegyptum argenteis

haereticorum

fraudem destruis ;

alter Moyses

rubri maris

tutum facis transitum ;

9. Per manna pascis
Israelitas,

Deum contemplantes animans ;
fontes eremi
sitientibus

haurire donas, cunctis corda
rigans exhausta ;
septem gentium
regna praecipis
debellari
et deleri funditus.

10. Valentes
ergo videre
terram promissionis

11. Sequamur

omnes constanter
callem tanti praeconis.

12. Lac et mel ibi fluere
est Iesu Christi faciem
semper aspicere.

13. O sancte praesul, obtine,
ut nobis illa liceat
frui dulcedine,

14. Quam neque visu quisquam
nec auribus neque corde
valet percipere
in huius incolatu corporis
mentes valde prementis.