367. De sancto Marriali.

1. Magna virum resonent Domini praeconia Christi,
Martialem lyricae reboent concorditer odae,
Gallia tota sonet citharizans et rhytmice plaudat.

2. Applaudant sistris sacra tympana, cymbala, aena,
Musica flabra movete modos fidibusque canoris
Laudis apostolicae jubilo resonando choreis.

3. Roma, Ravenna boent claris reboando camoenis,
Hierusalem, Nablis canat organa voce sonora,
Discipulo regis, cui constat apostolus ipse.

4. Concrepet urbs regis magni, quae est visio pacis,
Hierusalem, quam restaurare Deus venit ipse,
In qua discipulum rex Martialem sibi legit.

5. In qua lavit eum Petrus baptismate princeps,
Carne propinquus ei, Benjamin stirpe creato,
Marcello, Elisabeth genitoribus undique claris.

6. Ad sublimia apostolici quem culminis, inquam,
Culmine apostolico vexit soliumque thronumque
Rex et apostolicam dedit huic sedemque tribunal.

7. Legaleque dedit sceptrum, vis officiumque,
Inter bissenos proceres propriosque clientes
Nec non septuaginta duo, quae est aurea libra.

8. Intensis modulis pulchris fidibus variatis
Calliope, Thalia, Clio, Melpomene, Musae,
Euterpe soror Uraniaque canant modulando.

9. Sic Eratho cum Terpsichore, Polhymnia dulcis,
Tibicinumque chorus, cantorum turma resultent,
Martialem DomiDi patriarcham discipulumque.

10. Altisonae coeli turmae, clamate potenter,
Viribus angelicae totis cantate cohortes,
Quomodo sumpsit apostolicum jus, promite fibris.

11. Plausibus harmonicis verum super astra polorum
Dicemus, cantu, modulis per climata cosmi,
Rex legit sibi discipulum fecitque beatum.

12. Omnibus in terris memorandum luce venusta
Fecit eum decies septem geminisque colonis,
Bisseni quoniam pauci rarique coloni.

13. Sic quoque paschali coena famulam sibi fecit,

Tartara post foribus clausis quem pneumate sanxit
Tradendo claves solvendi cuncta, ligandi.

14. Tantis reliquiis piscis mellisque refertum

Mox evangelicum per mundum spargere misit,
Aethera quem librans propria dextra benedixit.

15. Omnigenis linguis scitum paraclitus ipsum
Exhibuit testem, non vincendum neque victum,
Nam testatus ubique fuit magnalia Christi.

16. Lumen apostolicum deinceps quem flamen abire
Destinat ad Gallos, partemque suam dedit esse
Alpibus a Juliis usque ad montes Pyrinaeos.

17. Unde simul venit Siriam cum principe Petro,
Cui comes jndisjunctus erat, quo nempe rogante
Semina spargebat fidei linguis populisque.

18, Sed post Romulidas adeunt, tura pontificali
Sede Petrum Martialis apostolus ad Lateranos
Cum Lino, Cleto, Senioribus inthronizavit.

19. Christus item Petrusque jubent propriam sibi sortem,
Sorte datam partem properet gentemque ferocem
Gallorum trahat ad vitam rapiatque barathro.

20. Rite subit Gallos gemino seniore sequente
Alpiniano, Austricliniano *** utroque,
Lemovicaque duo testes in sede locarunt.

21. Insignem Domini missum clarumque clientem,
Martialem praeceptoremque suumque magistrum,
Qui regem Stephanum Gallos gentesque Aquitanas.

22. Subdiderat Christo, cujus hic apostolus, hic est
Discipulus, praesul, virgo martyrque propheta,
Virgo profecto fuit, martyrque propheta refulsit.

23. Tu, Siria, tu, Graecia, Hierusalem quoque Roma,
Gallia, Aquitana plaga, Tolosa, Lemovix,
Burdegala, Arvernus, Turonum, Biturica nec non,

24. Instanter laudate Deum, qui magnificavit

Martialem, coeli terraeque per omnia plaudant
Christo, cujus apostolus est per aeon sine fine.