14. (11). In Inventione Protasii et Gervasii, Martyrum Mediolanensium.

1. Grates tibi, Iesu, novas, Novi repertor muneris, Protasio, Gervasio Martyribus inventis cano.

2. Piae latebant hostiae,

Sed non latebat fons sacer; Latere sanguis non potest, Qui clamat ad Deum patrem.

3. Caelo refulgens gratia Artus revelavit sacros, Nequimus esse martyres, Sed repperimus martyres.

4. Hic quis requirat testium Voces, ubi factum est fides? Sanatus impos mentium Opus fatetur martyrum.

5. Caecus recepto lumine

Mortis sacrae meritum probat Severus est nomen viro, Usus minister publici.

6. Ut martyrum vestem attigit Et ora tersit nubila, Lumen refulsit illico Fugitque pulsa caecitas.

7. Soluta turba vinculis, Spiris draconum libera, Emissa totis urbibus, Domum redit cum gratia.

8. Vetusta saecla vidimus, lactata semicinctia, Tactuque et umbra corporum Aegris salutem redditam.