2.

(2. ) Hymnus Secundus

(in principio mutilus).

1. Fefellit saevam verbum factum et caro, Deique tota vivi in corpus irruis.

2. Gaudes, pendentem cernis ligno cum crucis, Tibique membra fixa clavis vindicas.

3. Hanc sumis ante pompam tanti proelii: Sputus, flagella, ictus, cassa arundinis.

4. Ibat triumpho morte sumpta a mortuo Deus inferno vinci regno nesciens.

5. Kandens frigescit stagnum pallidae Stygis, Rigensque nescit Phlegeton se fervere.

6. Lux orta vastae nocti splendet, inferum Tremet et alti custos saevus Tartari.

7. Mors, te peremptam sentis lege cum tua, Deum cum cernis subdidisse te tibi.

8. Non est caducum corpus istud, quod tenes, Nullumque in illo ius habet corruptio.

9. Omnis te vincit carnis nostrae infirmitas, Natura carnis est connata cum Deo.

10. Per hanc in altos scandam laeta cum meo Caelos resurgens glorioso corpore.

11. Quantis fidelis spebus Christum credidi, In se qui natus me per carnem suscepit.

12. Renata sum, o vitae laeta exordia! Novisque vivo christiana legibus.

13. Sanctis perenne munus praestat hoc Dei, Conformi secum vivant post haec corpore.

14. Terror recedat mortis tandem, mors, tuae, Sinu me laetam patriarcha suscipit.

15. Vivam locata post haec in caelestibus, Dei sedere carnem certa a dexteris.

16. Xriste, reversus caelos victor in tuos, Memento carnis, in qua natus es, meae.

17. Ymnos perennes angelorum cum choris In hoc resurgens laeta psallam corpore.

18. Zelavit olim me in morte Satanas,

Regnantem cernat tecum totis saeculis.