1. Hymnus primus de Deo patre.

1. Deus, Deus, sanctus, sanctus,
Solus dignus dominari,
Et sit ei maior mantus,
Totus dignus exaltari,
Fiat sibi semper cantus,
Solus Deus adorari.

2. Gloria, honor ac laus
Semper nostro genitori,
Nulla fiat sibi fraus
Deo nostro redemptori,
Reverentiaque salus
Sibi, omnium pastori.

3. Est omnis sapientia
A Deo, summae virtutes,
Doctrinaque scientia,
Status, honorque salutes,
Pax omnis cura clementia,
Hoc credere tu[que] debes.

4. Unus Deus venerandus,
Solus Deus metuendus,
Unus Deus est amandus,
Solus Deus est timendus,
Unus Deus adorandus,
Solus Deus perquirendus.

5. Ipse magnus solus Deus
Et gubernator omnium,
Quidem est salvator meus
Et verus custos ovium,
Tristis omnis est Hebraeus
Abhorrens eius solium.

6. Ama Deum toto corde,
Time Deum ex amore,
Ei servi sine sorde,
Lauda eum in honore,
Ama fratrem, non tu morde,
Deum quaere in timore.

7. Deum ora et exalta,
Ipsum quaerens invocabis,
Deo psalle seu canta,
Sanctum Deum exspectabis,
Tua laudatio sit sancta,
Et in Deo iubilabis.

8. Ante tuumque conspectum
Semper Deum tu praeponas,
Ex eo sanctum, perfectum,
Sine ipso non disponas,
Absque ipso imperfectum,
Cave, Deum non postponas.

9. Care Deum confitere,
Debes eum venerari,
Deum debes sustinere
Et in ipso gloriari,
Cura eum retinere
Et in ipso te laetari.

10. Et in Domino tu gaude
Et exsulta tu in Deo
Placens ei sine fraude,
Non nocebit tibi leo,
Ipsum ama corde valde,
Et spes tua sit in eo.

11. Tu in Deo glorieris
Despiciens praesentia,
Coram Deo non vereris,
Si manes in prudentia,
Apud Deum magnus eris,
Si servis in placentia.

12. Debes gratias referre
Deo nostro atque laudes,
Deus caeli est et terrae,
Et ex eo certe gaudes,
Debes ei tu deferre,
Pellens dolos atque fraudes.

13. Magno Deo te submitte
Tuum votum reddens sibi,
Tu promissa serva stricte
Et considera tu tibi,
Legem serva tu non ficte,
Tu in caelo eris ibi.