1. De Essentia Dei.

1. Esse, quod est ex se, Deus est, per quem datur esse,

Quod non est ex se, deitatis non habet esse.

Esse, quod est, Deus est, cui verum competit esse,

Convenit huic soli, quod nulli convenit, esse.
5. Ante Deam nihil est, quod possit eo prius esse,

Post illum nihil est, quod posterius queat esse.

Supra quem nihil est, quod dicam celsius esse,

Extra quem nihil est, quod dicam latius esse.

Omne quod est, opus illius est, dedit omnibus esse,
10. Et sine quo nihil est, nihil aut fuit aut valet esse.

Cujus majestas disponens cuncta penes se,

Ut nunquam coepit, sic nunquam desinit esse.

Omne, quod est, quod erat, quod erit, par huic nequit esse,

Praeter quem solum Deus alter non valet esse.
15. Namque Deum verum verax ratio negat esse,

Quem labor aut manus hominis perduxit ad esse.

At Deus omnipotens, cui nullus bomo dedit esse,

Immo qui faciens hominem reparavit ad esse,

Hic vere Deus est, et non Deus hic nequit esse,
20. Et Deus ipse deos super omnes creditur esse.

Totum totus habens, toti vult jure praeesse,

Cuncta creando sibi, vult cuncta creata subesse.

Totus ubique suum non alternat Deus esse,

Qui modo non alius quam pridem creditur esse.
25. Omnia transmutans nequit hic mutabilis esse;

Aeternusque Deus habet aeternaliter esse.

Qui cum sit magnus, minor aut major nequit esse.

In quo semper erat, in eodem permanet esse.

Quem decet esse, quod est, sed non decet esse necesse,
30. Immo nec esse, per hunc bonus omnis homo valet esse.

Non aliena bonum bonitas illum facit esse,

Ex propria bonitate sua scitur bonus esse.

Ergo factorem factura Deum sciat esse,

Cui mirabiliter mirabile competit esse.
35. Orthodoxa fides personas tres probat esse

In deitate, deos sed tres negat in tribus esse.

Ingenitus genito genitura dat Deus esse,

Nec tamen hic genitor habuit genito prius esse.

Spiritus almus ab his. procedens par habet esse,

40. Una sed in tribus substantia creditur esse.
Utque coaeternum personis convenit esse,
Sic par majestas, par virtus fertur inesse.
Quod pater est, hoc filius est, hoc spiritus esse
Dicitur, unus enim Deus unum continet esse.

45. Qui tamen est genitor, non et genitus valet esse,
Qui vero genitus est, et spiritus nequit esse.
Sicut in uno tres personas dicimus esse,
Sic in personis tribus unum credimus esse.
Garriat ergo licet Sabellius, hunc nihil esse,

50. Sic orthodoxus tenet et sic adstruit esse.
Arrius infelix quod non sic credidit esse,
Tartareis flammis meruit sine fine subesse.
Taliter alma fides de vero disputat esse,
Taliter ut credant, reor, omnibus esse necesse.

55. Hoc nisi credamus, nisi confiteamur, id esse,
Firmiter et sane, salvi non possumus esse.