2.

Hymnus de eodem.

1. Quam laeta Dei facies,

Quam summum tuum gaudium !
Tu es sanctorum acies,
Quam sanctum tuum prandium !
Nos te videre facies,
Tu plenus certe laudium.

2. Tu magnusque terribilis,
Aeternus, potentissimus,
Tu mitis atque humilis,
Tu sanctusque iustissimus,
Tu das salutem populis,
Tu clemensque piissimus.

3. Esto Dei imitator
Manens in dilectione,
Dei nostri sis amator
Cordis cum affectione,
Erit Deus tibi dator
Vitae cum protectione.

4. Elongantes se a Deo
Ruent ipsique peribunt,
Hos offendit malus leo,
Te tueri non valebunt,
Adhaerentes Deo vero
Dei regnum introibunt.

5. Non sic a Deo devians
Deo subiecte pareas,
Tu non sis fratrum iudicans,
Deumque fratrem diligas,
Non sis in iure claudicans,
Tu Deo preces dirigas.

6. Tu cura Deum quaerere,
Ama fratrem caritate,
Velis honeste vivere,
Redde ius in claritate,
Tu fratrem noli laedere,
Vias tuas in unitate.

7. Sine Deo nil perfectum,
Offendis, si non diligis,
Si tu geris inhonestum
Et fratri ius non porrigis,
Non habebis tu effectum
Nec iter bonum dirigis.

8. Non timebis inimicum
Et, si Deus est adiutor,
Non incedes per obliquum,
Tibi Deus erit tutor,
Quaere Deum in amicum,
Qui malorum est repulsor.

9. Homo Dei est imago
Et factus ei similis,
Appellatur hic virago
In mundo magis nobilis,
Vae, si contra ipsum ago
Vel sum ad malum labilis.

10. Noster spiritus creatur
In caelo a summo Deo,
Ut in carnem infundatur,
Et ex eis fiat homo,
Hic ad Deum revertatur,
Cum recedit hic ab imo.