2. (2.) De sancto Birino.

Agmina sacra poli iubilent modulamine dulci,

Gaudia multiplicent agmina sacra poli.
Bella cruenta silent, ubi oaelica milia gaudent,

Cuncta ubi pace vigent, bella cruenta silent.
Coetus amore pio reboat sollenniler hymnum,

Plectra canora ferit coetus amove pio.
Dignus honore pater Birinus in aethere pollet,

Sanctus adest omni dignus honore pater,
Exsul ad hunc populum qui venit ab urbe Quiritum

Pro Christo pergens exsul ad hunc populum,
Fortis et armipotens Kynegils quo tempore regnat

Barbarie frendens, fortis et armipotens.
Gratia mira Dei sed eum mitescere fecit ;

Mox ut eum tetigit gratia mira Dei,
Hostica barbaries omiris sedatur in illo,

Cessit et extemplo hostica barbaries.
Igne perusta Dei populorum pectora fervent

Inque Deum credunt igne perusta Dei.
Kastra polo sociat spoliatque Birinus Avernum,

Gurgite quotque lavat, castra polo sociat.
Liber adest populus sub longo tempore servus,

Nunc famulans Domino liber adest populus.
Magne patrone, tuus nos traxit ab hoste triumphus,

Nos labor eripuit, magne patrone, tuus.
Nostra camena tibi canit haec, pia carmina patri

Intonat et iubilat nostra camena tibi.
Organa clarisonis reboant tibi dulcia bonitas,

Et crepitant modulis organa clarisonis.
Pervia porta poli per te reseratur ovili

Teque patente patet pervia porta poli.

Quis, pater, apta queat tibi pangere cantica laudum,

Reddere vota tibi quis, pater, apta queat?
Rector apostolicus populo vocitaris in isto,

Tu regis hunc populum rector apostolicus.
Sit benedicta dies, in qua maris alta petisti,

Huc te quae duxit, sit benedicta dies.
Te Deus omnipotens istam praemisit ad urbem

Hicque patrem statuit te Deus omnipotens,
Ut releves fragiles hic ad tua limina flentes,

Et nos indignos ut releves fragiles.
Xristus amore tuo veniam non denegat ulli,

Sed lacrimis parcit Christus amore tuo.
Ydra maligna fugit, hic te praesente peribit

Teque fovente tuos hydra maligna fugit.
Zelus adesse nequit, tua pax ubi sancta quiescit,

Pax ubi perpes erit, zelus adesse nequit.

Alme Birine, tuos defende benignus alumnos

Exaudique dulos, alme Birine, tuos.
Moenibus in superis resides patronus herilis,

Sis memor et nostri moenibus in superis.
Eripe nos, petimus, taetri de fauce profundi

Mortis et a laqueo eripe nos, petimus.
Nomina nostra Deo pius et memorare memento

Commendaque pio nomina nostra Deo.