Prima Quinquagena.

1. Ave salutiferum

sanctae crucis lignum,

Contra pomum noxium

fructum ferens dignum,

Per tuum mysterium

et per crucis signum

Hostem procul arceat

Dominus malignum.

2. Ave, crux, victoria,

regis saeculorum,

Contra quem convenerant

reges Iudaeorum,

Regum rex et dominus

omnium regnorum

Nos a iugo liberet

regum iniquorum.

3. Ave, crux, qua moriens

Dominus dormivit,

Qui signatum lapide

sepulcrum exivit,

Membra donet subsequi,

quo caput praeivit,

Qui surgens a mortuis

in caelum abivit.

4. Ave, signum typico

tau praesignatum,

Lumen vultus Domini

super nos signatum,

Qui ferunt in frontibus

signum tam sacratum,

Lumen ferant fidei

cordibus collatam.

5. Ave, crux, quam sanguine

tinxit salutari,

Quem docemur sanguinem

virum detestari,

Nos a viris sanguinum

nolit inquinari,

Qui nos suo sanguine

voluit salvari.

6. Ave, per quam Domini

furor est placatus,

Cum pro nobis innocens

agnus est oblatus,

Ne rursum nos arguat

ira conturbatus,

Gemitus et lacrimae

diluant reatus.

7. Ave, per quam fortior

fortem superavit,

Vita mortis principem

morte triumphavit,

Salvet nos a gladio

suo, qui vibravit,

Qui tetendit hostibus

arcum et paravit.

8. Ave, per quam Christus est

caelis elevatus,

Paululum ab angelis

terris minoratus,

In caelestis gloriae

sede coronatus,

Nostrae sit miseriae

per te miseratus.

9. Ave, qua iudicium

nostrum iudicare,

Nostram causam veniet

Christus ventilare,

Per te causas hominum

velit allegare

Iudex, qui iudicium

habet promulgare.

10. Ave, crux, qua moriens

de mundo migravit

Verus passer, hominum

qui lepram purgavit,

Qui pro lepra passerem

offerri mandavit,

Nos a lepra liberet,

quae mentem foedavit.

11. Ave, salus populi,

lignum sanctitatis,

Insignita lumine

verae claritatis,

Per te salvi videant

lumen veritatis,

Qui sunt in circuitu

rotae vanitatis.

12. Ave, qua succubuit

praedo depraedatus,

Inimicus amplius

non est exaltatus,

Per te mentis oculus

sit illuminatus

Nec in mortis dormiat

tenebris caecatus.

13. Ave, crux sanctissimo

sanguine respersa,

Quem sparsit in posteros

ludaea perversa,

Signo sui sceleris

per orbem dispersa

Per te sit captivitas

Israel aversa.

14. Ave, tabernaculi

mysticum altare,

In quo fuit hostia

nostrum salutare,

Pontifex et hostia

sanctae factus arae

Suo tabernaculo

nos det habitare.

15. Ave, cuius titulum

scimus immutatum,

Ut credamus stabilem

Christi principatum,

In te bibens Dominus

calicem murratum

Nostrum cor in Domino

faciat laetatum.

16. Ave, cuius summitas

ad caelum ascendit,

Profundum ad inferos

deorsum descendet,

Orantes exaudiat,

qui in te pependit,

Qui summa cum infimis

cruce comprehendit.

17. Ave, qua circumdatus

dolis dolosorum

Dolori condoluit

Christus mortuorum,

Nos a causis liberet

penitus dolorum,

Volans super Cherubim

et pennas ventorum.

18. Ave, per quam geminus

gigas fecit cursum,

De summis ad infima

faciens excursum,

Recurrens ab inferis

ad superna rursum,

Sui cursus socios

secum vehat sursum.

19. Ave, sacerdotii

finis figuralis,

In qua finem ceperat

unctio regalis,

Per te rex et pontifex

Christus aeternalis

Regum et pontificum

salus sit finalis.

20. Ave, quae dominicae

mortis passione

Divinae nos inseris

lapides coronae,

Ab ardentis clibani

servans ustione

Sua nos glorificet

Christus visione.

21. Ave, crux, qua singulis

membris cruciatus

Christus tulit omnium

membrorum reatus,

Flagris, sputis, colaphis,

clavis vulneratus

Cuncta curet vulnera

nostri cogitatus.

22. Ave, virga noxium

perimens serpentem,

Baculus, quo transiit

Israel torrentem,

Virga sis et baculus

omnem regens gentem,

Virga regat debilem

baculus potentem.

23. Ave, nostri gaudii

porta triumphalis,

Per quam sera tollitur

portae gehennalis,

Per te nobis aditum

pandat aeternalis,

Plaga facta Domini

latere letalis.

24. Ave, qua sustinuit

carnales defectus,

In carne qui similis

nobis est effectus,

Legem delinquentibus

dulcis det et rectus,

Quae delicta diluat,

dirigat affectus.

25. Ave, per quam innocens

caelis est regressus,

Innocenter uterum

virginis ingressus,

Innocens nocentiam

superans congressus,

Nobis innocentiae

tribuat progressus.

26. Ave, signum gloriae,

signum lucis verae,

In quo bona Domini

credimus videre,

Qui per crucem docuit

hostem non timere,

In terra viventium

nobis det gaudere.

27. Ave, cuius brachiis

Christus est extensus,

Patri preces offerens

in cruce suspensas,

Nos a lacu liberet

poenalis descensus,

Cuius iam refloruit

nobilis ascensus.

28. Ave, per quam vitulus

passus pascualis

Patris tenet solium

patri coaequalis,

Nostris sit propitius

et misertus malis,

Quem figurat vitulus

Libani legalis.

29. Ave, de qua gaudium

matutinum fluxit,

Cum Christus ab inferis

mortuos eduxit,

Nos ducat ad gaudium,

quo suos perduxit,

Scindens saccum corporis,

sibi quem obduxit.

80. Ave, crux, qua natio

Dominum derisit,

Quae Christum occiderat,

Barrabam dimisit,

In te suum spiritum

patri qui commisit,

Nobis mittat spiritum,

quem de caelo misit.

31. Ave, delinquentium

dulcis medicina,

Qua delicta diluit

pietas divina,

Per te paenitentiae

sanet virtus trina,

Quos configit animi

vulnerati spina.

32. Ave, cuius laudibus

iustos exaltare,

Cuius decet gloriam

rectos collaudare,

Per te carnis citharam

recte det sonare,

Qui cordis psalterium

sibi vult cantare.

33. Ave, benedictio

nostri redemptoris,

In qua benedicitur

universis horis,

Nos, qui benedicimur

signo crucis foris,

Intus gustus satiet

divini dulcoris.

34. Ave, nostrae fidei

singulare scutum,

Quo munitur fragile

nostrae carnis lutum,

Passus clavos, lanceam,

fel, acetum, sputum

Per te salvet hominem

ope destitutum.

35. Ave, de qua profluit

ubertas torrentis,

Qui dat efficaciam

cunctis sacramentis,

Per te nos inebriet

fons aquae viventis,

Qui salvabit homines

una cum iumentis.

36. Ave, signum removens

gladium nocentem,

Gladium versatilem,

gladium ardentem,

Qui removit Cherubim

gladium tenentem,

Gladium removeat

pauperes laedentem.

37. Ave, per quam Domini

servi vim fecerunt,

Amici cum proximis

de longe steterunt

Cicatrices carnium,

si quae putruerunt,

Curet, quem increduli

cruci confixerunt.

38. Ave, lignum unicum

placens salvatori,

Quo nostro succurrere

voluit languori,

Discretam custodiam

nostro ponat ori,

Qui tacens et patiens

in te venit mori.

39. Ave, per quam credimus

legem consummari,

Literam in spiritum

plene commutari,

Spiritali cantico

nos det innovari

Holocausto pecorum

nolens plus placari.

40. Ave, quam in umeris

suis Christus vexit,

Quibus dragmam decimam

ad novem revexit,

Nos vehat, quo pauperem

egenum evexit,

Qui per Iudam traditus

de morte surrexit.

41. Ave. quinque fontium

rivis decorata,

Quinque Christi vulnerum

sanguine sacrata,

Aquis horum fontium

nostra mens potata

Caritate sitiat

Christi vulnerata.

42. Ave, cuius hostiam

credimus venire

Sacerdotis precibus

in altare mire,

Quos altari Dominus

suo vult servire,

Ad altare gloriae

donet introire.

43. Ave, liberatio

populi credentis,

Non arcu vel gladio

suo confidentis,

Quos adhuc afflictio

premit pravae gentis,

Per te salvet dextera

Christi resurgentis.

44. Ave, per quam vestis est

sponsi redimita,

Murra, gutta, cassia

satis insignita,

Sponsa quoque vestibus

variis vestita

Domum, patrem, populum

per te sit oblita.

45. Ave, per quam impetus

duplicis liquoris

Effluxit de latere

nostri salvatoris,

Virtus aquae diluat

sordes peccatoris,

Sanctitatem conferat

sanctitas cruoris.

46. Ave, cuius brachiis

humilis pependit,

Qui virtutis brachium

longius extendit,

Qui salutem omnibus

gentibus impendit,

Nobis det ascendere

caelum, quod ascendit.

47. Ave, propugnaculum

sanctae civitatis,

Quam fundavit pietas

summae maiestatis,

Loco nos suscipiat

verae voluptatis

Susceptus in medio

nostrae vilitatis.

48. Ave, Deo pretium

solvens animarum,

Quas horrendus tenuit

locus tenebrarum,

Iugis meditatio

talium poenarum

Nos trahat ab ambitu

rerum terrenarum.

49. Ave, finis finiens

legis vetustatem,

Novae nobis conferens

vitae novitatem,

Nostrae laudis organo

donet puritatem,

Qui plus laude diligit

puram voluntatem.

50. Ave, miseratio

vera miserorum,

Qua fuit miseriae

misertus malorum,

Nos a multitudine

mundet vitiorum

Mundum mundans sanguine

vulnerum suorum.