5. In sanctae Luciae.

1. Christe, lux mundi, salus et redemptor

Et nobis forma redeuntis orbis,

Qui tuo totum proprio dicasti

Sanguine mundum.

2. Instrue nos te petere, quod optas,

Martyrum simus memores tuorum,

Luciae sacrae meritis juvemur,

Virginis almae.

3. Ut tuos semper famulos gubernet

Et tibi dignos faciat ministros,

Integros mentis, operumque simul

Dirigat actus.

4. Quae patris gazas fugiens reliquit

Simul et clarae genitricis opes,

Cujus et foedum pariter utraque

Virgo cruorem.

5. Nam cum ad sacrum tumulum Agathae

Sisterent ambae simul ad precandum,

Et fidem mater simul et salutem

Sensit in horam.

6. Tunc piae mater monitu puellae

Copias rerum satis universas

Vendidit, cuncta tradidit dilectae

Praemia natae.

7. Illa dum nullis agitata rebus,

Ne viro saltem habitura proles,

Cuncta dispersit truibuens egenis

Virgo beata.

8. Mox cum audivit, stupuit tyrannus,

Praeceps ut turbo removere vultus

Coepit et jussit sibi praesentari

Protinus illam.

9. Et modo blandis gravibusque minis

Publice terret, refovetque spondet,

Sed nullo illam potuit tenere et

Flectere pulchram.

10. Aestuat saevus nimio furore,

Jussit accendi famulis caminum,

Quae dum orasset humilis puella,

Flamma recessit.

11. Dumque infelix valide praefixam

Cerneret stantem penitus puellam,

Tunc boum jussit paria trahentum

Jungere multa.

12. Quam cum hinc nullus removere posset,

Lotium fundi capiti decoro

Jussit et torpens refugosa diu

Fronte remansit.

13. Tandem ad duros animum retorquens

Carnifex actus scelerumque nitor,

Praecepit cultrum graviter in ejus

Viscera mergi.

14. Quo licet facto diruit furentem

Alloquens plebem populumque totum,

Pace laetari ecclesiam recepta

Rege perempto.

15. Sicque cum palma Dominum petivit

Aetheris celsas gradiens ad aulas,

Et patris summi penetrat ad regnum

Martyra caelebs.

16. Gloriam patri resonemus omnes

Et tibi, Christe, genite superne,

Cum quibas sanctus simul et creator

Spiritus regnat.