6. In Transfiguratione Domini.

1 a. In eadem specie
Visum narrat hodie
Dominum scriptura,

1b. Qua transfiguratio
Eius in iudicio
Creditur futura.

2 a. Nec fert supervacue
Arduus mons ardue
Veri sacramenta,

2 b. In quo Christi facies

Splendet ut meridies,

Ut nix vestimenta.

3 a. Cui loquentes mutuo
Apparent continuo
Lex et prophetia;

3 b. Israel restitui

Regnum rogant cernui
Moyses cum Elia.

3 c. Quibus tabernacula
Tribus mente sedula
Tres offerunt tria.

4 a. Quod dum Petrus suggerit,
Ibi cunctos operit
Nubes luculenta,

4 b. Ne per scenam triplicem
Discordent ab invicem
Duo testamenta.

5 a. Inde super Dominum
Vox a patre luminum
Talis est audita:

5 b. Hic est mihi penitus
Placens unigenitus,
Veritas et vita.

5 c. Audite hunc igitur,
Quia, sicut loquitur,
Semper erit ita.

6 a. Quia de unigenito
Vox est lapsa subito
Patris a persona,

6 b. Tres metu praecipiti
Corruunt attoniti
In facie prona.

6 c. Sed ad vocem Domini
Succedit formidini
Securitas bona.

7 a. Ut autem distinctio
Duorum a tertio
Bene sit discreta,

7 b. Evanescens protinus
Moyses clandestinus
Vivaxque propheta,

7 c. Remanente Domino
In aspectu pristino,
Veste consueta,

8 a. Dicente perterritis :
Nemini dixeritis
Visionem antea,

8 b. Quam de mortis fovea
Et Edon sanguinea
Redeam cum gloria

9. Resultante Alleluia.