7. De Beata Maria V.

Lectio I.

1. Forma, decus puellarum

Et sanctior feminarum,

Regis iustitiae solem

Gaudes esse tuam polem.

2. Ut sanctus evangelista

Fideliter dicit ista,

Verum Deum incarnatum

Confitemur tuum natum.

3. Verba, quae dixit propheta,

Cognoscimus adimpleta,

Dat Deus benignitatem

Propter suam caritatem.

Lectio II.

1. Terra nostra dedit fructum

De caelestibus adductam,

Quo cibati et refecti

Universi sunt electi.

2. Hanc, ut psalmista praedixit,

Terram Deus benedixit

Avertens captivitatem

Et dans nobis libertatem.

3. Praefulgida maris stella,

Iesum Christum interpella,

Ut tua prece placatus

Nostros expurget reatus,

4. In mundo pro quo pressuram

Tu sustinuisti duram,

Martyrium passa forte

Illius conspecta morte.

5. Capta nimio maerore

Satiata es dolore,

Dum dator aeternae lucis

Toleraret poenam crucis.

Lectio III.

1. Tu assumptionis hora

Consurgens velut aurora,

Sicut cunctis est compertum,

Mundi relinquens desertum.

2. Adest angelorum coetus

Et Iesus occurrit laetus

In caelesti regno secum

Te locans, ut fuit aequum,

3. Inter claras margaritas

In caelesti sede sitas

Dans fulgorem claritatis,

Nil habens obscuritatis.

4. Sancta sic glorificata,

Dilue nostra peccata

Rogans regem sempiternum,

Ne cadamus in infernum,

5. Regnum sed possideamus,

In quo semper gaudeamus

Cum agminibus sanctorum

Per saecula saeculorum.