LIBER RUTH.

in diebus unius Judicis

Beatissima Domina vocatur Mater pulchritudinis, sed mihi in passione Filii sui

fuit amaritudinis, et moeroris. Ruth, I, 19 et seq. : Dicebant mulieres, in adventu

Noemi in Bethlehem, quod potest respicere duplicem adventum B. Virginis, vel adventum in mundum per nativitatem, vel adventum, quando venit in Bethlehem ad pariendum : Haec est illa Noemi, Haec est illa, in qua macula etiam venialis peccati non est, quae in utero portat candidum et rubicundum. Sed quod sequitur, respicit statum passionis Christi. Quibus ait: Ne vocetis me Noemi (id est pulchram), sed vocale me, nunc in passione Filii mei, Mara (id est amaram), quia amaritudine valde replevit me Omnipotens, scilicet Dominus qui replevit me in annuntiatione gaudio et laetitia, in passione vero maerore et tristitia. Egressa sum plena, in annuntiatione, quando dictum est mihi, Luc. I, 28 : Ave, gratia plena. Et vacuam reduxit me Dominus, cum sola rediens Filium meum reliqui in sepulcro. Cur ergo vocatis me Noemi, quam Dominus humiliavit, et afflixit Omnipotens ? Dolores ergo, quos effugeram in nativitate, nunc omnes persolvi in Filii mei passione, ut Damascenus aiebat .''

Item, Ipsa est ancilla electionis, et operationis. Ruth, II, 2 et seq.: Dixit Ruth, quae interpretatur videns, festinans, indeficiens : Vadam in agrum, scilicet Ecclesiae, et colligam spicas, id est, pauperes, caecos, et claudos, more Filii mei, qui hujusmodi libenter colligit, quae fugerint manus metentium, scilicet mundi, et diaboli. Diabolus fere universam terram congregaverat, mittens falcem suam in messem alienam : unde et gloriando dicit, Isa. x, 14 : Universam terram egocongregavi. Colligit autem ancilla Dei in agro Ecclesiae humiliter, quia spicas remanentes : fideliter, quia sequens messorum vestigia, ut quod, alii abjiciunt, ipsa sumat. Unde, Psal. XXVI, 10: Quoniam pater meus et mater mea dereliquerunt me: Dominus autem assumpsit me. Perseveranter, quia usque in finem mundi, fideles ad se congregat. Unde sequitur, V. 7 : De mane usque nunc stat in agro, et ne ad momentum quidem domum reversa est.

Item, Dixit Booz, id est, Deus : Colligentem, scilicet Mariam, quae colligit quos vult, nemo corripiat.

Item, Colligit sapienter: unde sequitur, VV, 17 et 18 : Quae collegerat virga caedens, scilicet tribulationis, et excutiens, invenit hordei tres modios, scilicet Conjugatos, Viduas, et Virgines. Quos portans in sinu misericordiae, et in dorso patientiae, reversa est in civitatem, scilicet Jerusalem coelestem.

Item, Ipsa est quae se et nos vestivit, et cooperuit, et involvit pallio divinitatis, sicut dicitur de Christo in Praefatione : " Ut nos divinitatis suae tribueret esse participes. " Ruth, III, 9 et seq. : Dixit Ruth ad Booz, id est, ad Deum: Ego sum Ruth, ancilla tua: expande pallium tuum super famulam tuam, quia propinquus es. Et ille: Benedicta, inquit, es a Domino, filia.... Noli ergo metuere: sed quidquid dixeris mihi, faciam tibi: scit enim omnis populus qui habitat intra portas urbis meae mulierem te esse virtutis. Nec abnuo me propinquum, etc.