8. Quod inspissare vaporem seu nubem, et in aquam redigere sit per frigus, et disgregare per calidum, congelare vero per idem frigus invalescens atque constringens.

Convertere igitur vaporem est inspissando ad materiam aquae redigere. Cum autem frigoris sit inspissare sicut calidi disgregare, patet quod omnis conversio vaporis fit per frigus. Congelatio autem fit per idem frigus confortatum et constringens aquam quae conversa est.

Item notandum, quod aliqua nubes est conversa in partibus suis, quae scilicet est aqua facta. Et aliqua est in via conversionis, quae scilicet est in aqua frigida. In his igitur est expressius loquendum, propterea quia saepius veniunt in tractatum.

Dico, quod omnium eorum quae generantur ex vapore humido, nihil est inflammabile. Item quia aqua est elementum magis tenue quam terra, propter hoc calor solis attrahens tales vapores, non multum retinetur ab ipsis vaporibus, sed, est exhalabilis per frigus constringens vaporem ipsum. Et ideo nullus vaporum multum pergit per regionem frigoris ad regionem aestus, sed elevatur plus et plus in regionem frigoris excellentis vel temperati, secundum quod sunt calidiores vel minus calidi.