7. In Transfiguratione Domini.

1 a. Iucundare, plebs devota,
Christum laudans mente tota
In hymnis et canticis ;

1b. Congaudendo suo festo,
Puro corde rite praesto,
Donis ornans mysticis ;

2 a. Quod in monte transformatur,
Thabor qui denominatur,
Recolens memoria.

2 b. Duo nati Zebedaei,

Simul Petrus verbi Dei
Ferant testimonia.

3 a. Lorica humilitatis
Ornamento claritatis
Tecta visibiliter,

3 b. Solis versus in splendorem
Vultus, nivis in candorem
Vestes mirabiliter.

4 a. In figura praesignatur,
Moysi cum inflammatur
Vultus Dei lumine.

4b. Israel hoc admiratur,

Cum praeceptum Dei datur
Sinai cacumine.

5 a. Christus nube obumbratur,
Verbum suum attestatur
Placens voxque patria.

5 b. Duo vates cum Messia
Moyses et cum Elia
Christo dant colloquia.

6 a. Petit Petrus instaurari,
Christo vatibusque dari
Tria tabernacula.

6 b. Quod in monte Christus gessit,
Revelari non expressit
Gentibus per saecula.

7 a. Demum ipso resurgente
Praedicandum omni gente
Docuit discipulos.

7 b. Tristes valde recedentes,
Post ad ipsum venientes,
Portantes manipulos,

8 a, Confortavit se visuros,
Morituro compassuros
Divina praesentia,

8 b. Ut sic magis confortati
Et in fide solidati
Non timerent gravia.

9 a. Testis transformationis
Non gustabit vim agonis,
Nisi cum revenerit

9 b. Bonos malos iudicando,
Praemia cuique dando,
Dictum tunc recipiet.

10 a. Nec cum suis sumet gustum,
Donec novum bibat mustum
De vitis genimine ;

10b. In regno patris caelestis
Nulla mors nec ulla pestis,
Nec quis caret lumine.

11 a. Bone pastor, lumen verum
Tenax vigor, Deus rerum,
Tu nos solvas a peccatis
Et in regno claritatis
Fac nos tecum vivere ;

11b. A tortura nos defende,
Faciem tuam ostende,
Ut post cursum huius vitae
Mereamur nos ''Venite
''A te tunc percipere.