Sermo VII

Item, sermo Fratris Bonaventurae prima Dominica de Adventu coram Universitate in Montepessulano.

vidi, et ecce nubem candidam et super nubem sedentem similem Filio hominis, Apocalypsis decimo quarto.

Sacer Evangelista Ioannes caelesti claritate suspensus et sublimi revelatione attonitus. explicat nobis in verbis propositis beatae incarnationis mysterium sub metaphoricis verbis dupliciter, scilicet quantum ad puritatem elegantissimam electae Virginis concipientis, et quantum ad subli mitatem nobilissimam ipsius superbenedictae conceptae prolis. Primum notatur in nube candida; secundum, in sedente super eam etc.

Circa haec nota, quod quia istud mysterium est tam arcanum, quod null ius ingenii perspicacitas potest comprehendere ; tam altum, quod nullius intelligentiae vivacitas potest investigare; tam profundum, quod nullius eloquentiae vel eloquii facultas potest enarrare: ideo Spiritus sanctus sub diversis figuris illud manifestat, ut quod una non potest altera suppleat.

Circa quod nota, quod puritas elegantissima Virginis electae concipientis et ipsius conceptionis designatur in sancta Scriptura sub metaphora non solum nubis candidae sive candentis, sed etiam rubi mirabiliter inflammati et incombusti ad designandum quod fuit sine corruptione carnis; Exodi tertio: Videbat, quod rubus arderet et non combureretur.

Virgae mirabiliter virescentis et florescentis ad designandum, quod fuit sine successione temporis; Numerorum decimo septimo. : Invenit, germinasse virgam Aaron in domo Levi, et turgentibus gemmis, eruperant flores.

Velleris mirabiliter compluti et irrorati ad designandum, quod fuit sine delectatione libidinis; Iudicum sexto : Expresso vellere, concham rore, implevit.

Nubis mirabiliter irrorantis ad designandum quod fuit cum plenitudine fontalis gratiae; Ecclesiastici trigesimo quinto : Quasi nubes pluviae in tempore siccitatis.

Iridis mirabiliter refulgentis ad designandum, quod fuit cum plenitudine fontalis sapientiae; Ecclesiastici quadragesimo tertio : Vide arcum et benedic eum qui fecit illum; valde speciosus est in splendore suo. Arcus in nube, Christus in Virgine quadricolor, quia cognitionem habens innatam, infusam, acquisitam et gloriosam.

Sideris mirabiliter dirigentis ad designandum, quod fuit cum rectit udine venerabilis vitae; Ecclesiastici quinquagesimo : Quasi stella matutina i n medio nebulae et quasi luna plena in diebus suis lucet.