LIBER REGUM PRIMUS.

Fuit vir unus de Ramathaim Sophim

Regina coelorum est arca exsultationis in tabernaculis justorum, et arca timoris in tabernaculis daemoniorum et malorum.

1 Regum, IV, 5 et seq.: Cumque venisset, per nativitatem in mundum., arca foederis Domini, Id est, Maria, in castra, tribulatorum, tentatorum, et totius militantis Ecclesiae, timuerunt Philistiim, idest, daemones, dicentes : Vae nobis ! Venit enim illa, cur dictum est, Genes. III, 15 : Inimicitias ponam inter te, etc. Non enim fuit tanta exsultatio, scilicet peccatorum, heri ei nudiustertius, quando non habebant talem adjutricem. Et dixerunt Philistiim : Quaenam est vox clamoris magni in castris Hebraeorum? Psal. CXVII, 15 : Vox exsultationis et salutis in tabernaculis justorum. Et cognoverunt quod arca Domini venisset in castra.Et dixerunt: Vae nobis! Illi autem, scilicet Hebraei, bene nobis. Quis nos salvabit de manu deorum sublimium istorum ? Ubi enim ipsa est per adjutorium, ibi et Trinitas Deus.

Item, Ipsa est sol ardens, mater calefactionis frigidorum filiorum Adam. I Regum, XI, 9 : Cras erit vobis salus, g ratiae et veniae, cum incaluerit sol, id est, Maria. Numquid non incaluit, cum illi tota deitas substantialiter illapsa est ? Hic est sol, tripliciter nos urens. Unde dicitur, Eccli. XLIII, 4 : Tripliciter sol exurens montes, radios igneos exsufflatis, etc.

Ipsa est etiam cornu unctionis, ex quo unguntur ad dignitatem, ad sanctitatem, ad venustatem. I Regum, XVI , 1 et seq,: Dixitque Dominus, Pater, ad Samuelem, id est, Christum : Impie cornu tuum, id est, Mariam, oleo, id est, teipso, et omni gratia : quod factum est in incarnatione. Et unges, inde reges, et sacerdotes, et filios Dei, quemcumque monstravero tibi. Unde Bernardus: " De plenitudine ejus accipiunt singuli, et universi , etc. "

Item, Ipsa est civitas, et domus satietatis. I Regum, xx, 6: Rogavit me David ut iret celeriter: quod factum est in incarnatione, quando etiam praevenit Angelum, quem miserat ad Mariam Virginem gloriosam, in Bethleem, civitatem suam, sanctissimam, et opulentissimam. Unde sequitur: Quia victimae solemnes Deo, Angelis, justis, peccatoribus, ibi sunt universis contribulibus suis. Psal. lxxxvi, 3 : Gloriosa dicta sunt de te, civitas Dei, id est, Maria !

Item, Ipsa est refraenatrix irae Dei, quoad peccatores, quae David, id est, Christum, ab interfectione aeterna, Nabal stulti, id est, peccatoris refraenavit, signata per Abigail, quae, I Reg. xxv, 24 et seq., cecidit ad pedes David, se in omnibus humiliando. Et dixit: In me sit, domine mi, haec iniquitas. Glossa: " Noli ulcisci. " Malitia ergo non inveniatur inte, sed potius bonitas diffusiva, pietas ad condonandum, misericordia attractiva. Et ait David ad Abigail, placatus ejus Intercessione : Benedictus Dominus Deus Israel, scilicet Pater misericordiarum, qui misit te misericordissimam et prudentissimam, hodie, scilicet quandocumque intercedis pro peccatoribus, vel praecipue in assumptione, in occursum meum, ad placandum, ad refraenandum, ac ad componendum inter me, et peccatores, Et benedictum eloquium tuum, plusquam omnium Angelorum, imo omnium Sanctorum.Psal. CIV, 19 et 20: Eloquium Domini inflammavit eum. Misit rex et solvit eum, id est, peccatorem. Ei benedicta tu, quae prohibuisti me saevissimum contra peccatores, sicut dicit in Osee,V, 14 : Ego quasi leaena Ephraim, et quasi catulus leonis domui Juda, Ego, ego capiam, et vadam. Et, ibidem, xiii, 8 : Occurram eis quasi ursa, raptis catulis : et dirumpam interiora jecoris eorum, ulciscens

me manu mea gravissima et intolerabili.

Et nisi cito venisses in occursum mihi, quod factum est, quando nata est, peccatorum tibi reconciliationem assumendo, non remansisset Nabal usque ad matutinam lucem mingens ad parietem, quia totaliter delevissem eum. Erat autem Abigail mulier illa prudentissima et speciosissima .Et dixit David ad Abigail: Vade pacifice in domum tuam: ecce audivi vocem tuam. Sed quam vocem ? vocem miserationis pro peccatoribus, vocem conservationis pro justis, vocem fidelitatis pro servitiis exhibitis remunerandis. Et honoravi faciem tuam, in conceptione, te sanctificando, in nativitate tua, mundum per te illuminando, in incarnatione mea, te in matrem prae omnibus eligendo, et in assumptione tua, te ultra omnes choros Angelorum in mea dextera collocando.