8.

1. Cortex occidit literae,
Sed spiritus vivificat,
Sed plus, quam sat est, sapere
Turrim Bahel aedificat;
Cor hominis laetificat
Vini potus vel sicerae,
Si non cogat excedere,

Quod fides patrum praedicat.
2. Fides non habet meritum,
Quae rationem sequitur,
Stulte credit, quod subditum
Sit naturae, quo conditur;
Qua natura concipitur,
Naturis est absconditum,
Cum ex naturis editum
Vix ratio consequitur.

3. Naturae claudi regulis
Auctor naturae renuit,
Qui se revelans parvulis
Mundi prudentes latuit,
Cum sui formam induit,
Sic civis statum exsulis
Claris reformans vinculis
Morte mortem absorbuit.

4. In coelis homo positus
Sua lapsus superbia,
Ne desperet, quod insitus
Jugi esset miseria,
Sua Deus clementia,
Ne desperet, quod reditus
Non sit carnis et spiritus,
Summis junxit mortalia.

5. Ex viro facta femina
Sine mixtura seminis
Mundo suggessit crimina
In sui necem sanguinis,
Sed nostrae partus virginis
Abhorrens viri semina
Mundi tollit peccamina,
Dei proles et hominis.