Sermo VIII .

Item, sermo Fratris Bonaventurae prima Dominica de Adventu in domo Praedicatorum coram Fratribus in Montepessulano in Capitulo.

Germinet terra herbam virentem et facientem semen et lignum pomiferum faciens fructum iuxta gentis suum, Genesis primo .

Sacer Moyses, fontalis lucis radio illustratus et elevatus, explicat nobis Filii Dei adventum in carnem, quem modo colere coepimus, quantum ad tria facta, scilicet quantum ad fecunditatem caelicam gloriosae et almae Virginis concipientis, ibi: Germinet terra; quantum ad gratiositatem amoenam et pulcram conceptae beatae prolis; ibi: herbam virentem; quantum ad universalem et desiderativam utilitatem humani generis, ibi: et facientem semen et lignum pomiferum faciens fructum iuxta genus suum.

I. Circa haec nota, quod Virginis almae concipientis fecunditas et singularis nobilitas designatur sub metaphora terrae supernaturaliter germinantis, et hoc ad designandum seu insinuandum eius profundissimam humilitatem, ut hic: Germinet terra etc.

Modicis supernaturaliter pullulantis et hoc ad insinuandum eius inconcussam virtutem; Iob vigesimo nono : Radix mea aperta est secus aquas; Ecclesiastici vigesimo quarto: Radicavi in populo honorificato.

Fontis supernaturaliter satiantis, et hoc ad insinuandum eius liberalissimam caritatem; Genesis secundo : Sed fons ascendebat e terra, irrigans universam superficiem terrae; Canticorum quarto: Fons hortorum, puteus aquarum viventium, quae fluunt impetu de Libano.

Fluvii supernaturaliter irrigantis, et hoc ad insinuandum eius abundantissimam pietatem; Genesis secundo : Fluvius egrediebatur de loco voluptatis ad irrigandum paradisum.

II. Gratiosa vero amoenitas superbenedictae ipsius prolis designatur sub metaphora rosae praefulgidae, et hoc ad insinuandum suavitate m ipsius animae; Ecclesiastici quinquagesimo : Quasi flos rosarum in diebus vernis.

Urnae aureae, et. hoc ad insinuandum capacitatem multiformis ipsius gratiae; ad Hebraeos nono : In q ua urna aurea habens manna et virga Aaron, quae fronduerat, et tabulae testamenti.

Arcae auro circumtectae, et hoc ad insinuandum claritatem plenitudinis sapientiae; ad Hebraeos nono : Habens arcam circumtectam ex omni parte auro.

Aureolae aromaticae, et hoc ad insinuandum celebritatem ipsius vitae; Canticorum sexto : Dilectus meus descendit in hortum suum ad aureolam aromatum.

III. Perdesiderata huius adventus utilitas, quam fecit adveniens ipse, designatur sub metaphora solis singulariter stantis, et hoc ad designandum ipsius immutabilitate m celsitudinis; Iosue decimo : Stetit sol in medio coeti.

Solis singulariter retrocedentis, et hoc ad designandum ipsius mirabilem condescensionem ; Isaiae trigesimo octavo : Reversus est sol decem lineis per gradus, quos descenderat.

Solis singulariter sublatentis, et hoc ad insinuandum ipsius venerabilem dispositionem; secundi Machabaeorum primo : Tempus affuit, quo sol refulsit, qui prius erat in nubilo.

Solis singulariter regyrantis, et hoc ad insinuandum ipsius zeli incessabilem sollicitudinem; Ecclesiastae primo :

Lustrans universa in circuitu pergit spiritus et in circulos suos revertitur.