Proph. IX. Poenam in peccata relabentis esse graviorem.

In civitate Reatina jacebat vir Dei quondam infirmus. ad quem praebendarius quidam, nomine Gedeon. lubricus et

mundanus, infirmitate gravi correptus, adductus est, qui beatum patrem lachrymose rogabat cum simul astantibus, ut ab ipso crucis signaculo signaretur. Ad quem ille: " Fortis nomine, Gedeon, sed animo imbecillis, cum vixeris olim secundum desideria carnis non veritus judicia Dei, quomodo te cruce signabo? Verum propter devotas intercedentium preces signo te crucis signabo in nomine Domini. Tu tamen scito te graviora passurum, si ad vomitum redieris ab infirmitate liberatus. Propter peccatum enim ingratitudinis semper pejora prioribus inferuntur. " Signo itaque crucis super eum facto statim, qui contractus jacuerat, surrexit sanus et in laudem Dei prorumpens: Ego, inquit, sum liberatus. Paucis autem interlapsis dicbus Dei oblitus corpus impudicitiae reddidit. Cumque sero coenasset in domo cujusdam canonici nocteque illa dormiret ibidem, subito super omnes corruit tectum. Caeteris mortem evadentibus solus ille miser interiit. Justo igitur Dei judicio juxta viri Dei prophetiam facta,, sunt novissima hominis illius pejora prioribus" propter ingratitudinis vitium Deique contemptum, cum de accepta venia gratum esse oporteat et duplo displiceat flagitium iteratum. Bon. c. XI. n. 5.