9.

1. Exceptivam actionem

Verbum patris excipit,
Dum deludit rationem,

Dum naturam decipit,
Casualem dictionem

Substantivum recipit,
Actioque passionem

In hoc verbo concipit.
R In hac verbi copula
Stupet omnis regula.
2. Inter locos locum nescit

Locus a contrariis,
Sui locum obstupescit

Exceptum ab aliis,
Fit elinguis, obmutescit,

Fallitur in propriis
Et de suis erubescit

Logica fallaciis.
3. Peregrinat a natura

Nominis positio,
Cum in Dei transit jura

Hominis conditio,
Novus color in junctura,

Nova fit constructio,
Novus tropus in figura,

Nova fit translatio.

4. Dum ab uno non recedit,

Alteratur unitas,
Dum in unum se concedit,

Unitur alteritas,
In diversum idem cedit,

In idem diversitas,
Sui tamen non excedit

Limitem simplicitas.
R In hac verbi copula
Stupet omnis regula.
5. Artis suae in censura

Geometra fallitur,
Dum immensus sub mensura

Terrenorum sistitur,
In directum curvatura

Circuli convertitur,
Sphaeram claudit quadratura

Et sub ipsa clauditur.
6. Dum factoris et facturae

Mira fit conjunctio,
Quis sit modus ligaturae,

Quis ordo, quae ratio,
Quae sint vincla, quaejuncturae,

Qui gumphi, quae unio,
Stupet suo fracto jure

Musica proportio.

7. Solis lumen nube tectum,

Nubis sub velamine
Nostrae carnis fit objectum

Nec hebet in lumine,
Nostrum vergit in defectum

Sol ortus in virgine,
In defectum dans effectum,

Lumen in caligine.
R In hac verbi copula
Stupet omnis regula.

10.

1. Inflexu casuali

Verbum quod non inflectitur
Nec lege temporali

Corde patris egreditur,
Verbum nobis compatitur,
Ventri matris inseritur,
Quem clausit, ventre clauditur,
Et rubus non comburitur

Splendore spiritali,
De terra splendor oritur,

In partu virginali
Verus sol nube tegitur.
2. Probatica piscina

Jam movetur divinitus,
Atque de lapiscina

Scinditur lapis inclitus,
Cum virgo praegnans coelitus
Fit templum sancti spiritus ;
Aquae sperat introitus
Homo languori deditus

In fraude serpentina,
Aquam movet paraclitus,

Angeli medicina
Est homo vitae redditus.

3. In Adam causabatur

Veritas et justitia,
Cum patrocinabatur

Pax et misericordia,
Concors fit haec discordia
Novi partus infantia,
In excelsis sit gloria,
Nam carni Dei gratia

Pro pace maritatur;
Miranda sunt connubia,

Quibus pax reformatur
Inter nos et coelestia.
4. Ut Satan perferetur

Hamus in esca latuit,
Ut homo liberetur,

Hominem Deus induit,
Qui circumcidi voluit,
Cui spiritus apparuit,
Cui aqua pura vinuit,
Cui stella nova claruit,

Hic dum baptizaretur,
Benedicamus sonuit,

Ut benediceretur,
Qui benedici meruit.