11. De s. Amando Lemovicensi.

In 1. Vesperis.

Ad Magnificat.

A. Magnificet ecclesia

Amandi prodigia,

De quo caeli curia

Gaudet cum laetitia.

Ad1. Nocturnum.

Antiphonae.

1. Beatus Amandus in viis

Peccatorum non adfuit,

Sed vivere in eremo

Secus Vigennam voluit.

2. Pastores obstupuerunt,

Dum Amandum invenerunt

Inter rupes habitare

In eremo sine Iare.

3. Praesuli Lemovicensi

Roricio retulerunt,

Qualiter sanctum Amandum

In eremo invenerunt.

Responsoria.

1. Locus, ubi conversatur,

Commodoliacus vocatur,

Inter rupes positus

Iuxta Vigennae litus.

2. Roricius cellam ibi

Praecepit aedificari,

In qua beatus Amandus

Posset Deum venerari

Et vivere corde mundo

Segregatus ab hoc mundo.

3. Vir Amandus eremita

Tentabatur in hac vita,

Ut Deum respueret

Et idola coleret.

Ad 2. Nocturnum.

Antiphonae.

1. Cum Amandus invocaret,

Ut daemonem captivaret,

Iesum Christum, quemquaesivit,

Ipsum statim exaudivit.

2. Cellae portam propulsavit

Iunianus et clamavit:

Percipe, sancte Amande,

Verba mea et intende.

3. Ego vocor Iunianus,

Verus Dei christianus,

Qui destruo pugnatorem

Inimicum et ultorem.

Responsoria.

1. Cumque sanctum Iunianum

Vir Amandus recepisset

Et ipsum in fide nostra

Firmiter edocuisset,

Tandem spiritum Amandus

Redemptori reddidit,

Cuius corpus sepulturae

Iunianus tradidit.

2. Hugo, abbas Cluniaci,

Commodoliacum petens

Et ibi sancti Amandi

Vitam beatam audiens

Statim esse construendam

Basilicam disposuit,

Ubi beatus Amandus

Suam cellulam habuit.

3. Canonicis supradictis

Recedens Hugo praedixit

In cella sancti Amandi,

In qua ipse diu vixit,

Esse brevi ecclesiam

In eiusdem memoriam.

Ad 3. Nocturnum.

Antiphonae.

1. Cum ad Commodoliacum

Praefatus abbas revenit

Nec aliquid de capella

Esse factum adinvenit,

2. Tunc canonicus Ramnulphus

Promisit Amandi corpus

In eius cella quaerere

Et capellam construere.

3. Antequam corpus quaereret,

Triduum hic ieiunavit

Et in sancti Iuniani

Altari missam cantavit.

Responsoria.

1. Petrus levita, physicus,

Ramnulphi concanonicus,

Febris flamma cruciatus

Super arbore dormiit

Et a somno excitatus

Sanus factus abiit.

2. In tumuli apertione

Et corporis inventione

Ex membris sancti Amandi,

Confessoris venerandi,

Tantus odor emanavit,

Quod omnes vere languentes

Ad sepulcrum confluentes

Sospitati restauravit.

In Laudibus.

Antiphonae.

1. Amandus est nominatus,

Amans Deum et amatus

Per populum, quem docuit,

Et a Christo, quem coluit.

2, In lapide, qui est Christus,

Fundaverat fidem suam

Et in eo semper vixit

Et finivit vitam suam.

3. Dum Amandus ab hoc mundo

Feliciter exspiravit,

Eius corpus Iunianus

Iuxta petram tumulavit.

4. Beati corpus Amandi

Et eius reliquiae

Sunt inventae per Ramulphum

Die quartae feriae.

5. In caelis est elevatus

Amandus et laureatus

A Christo, cuius amore

Nitido vixit corpore.

Ad Benedictus.

A. Hodie canonicorum

Devotio ac sanctae manus

Sanctum corpus invenerunt

Amandi et transtulerunt

Iuxta thecam, in qua iacet

Sanctissimus Iunianus.

In 2. Vesperis.

Ad Magnificat.

A. In loco, in quo beatus

Amandus erat humatus,

Facta est ecclesia,

Per caius suffragia

Datur ibi caecis visus

Et redditur maestis risus,

Languentibus sanitas

Et claudis stabilitas,

Dementibus ratio

Et mutis locutio.