11.

1. Naturae primordium

Dum primordiatur,
Deiformis puritas

Dum matrificatur,
Et humanae deitas

Carni sociatur,
Enti metaphysico

Sic physis applicatur.

2. Patrem sua filia

Sine passione
Parit non praeambula

Viri mixtione,
Sed ex sola spiritus

Fecundatione
Partus sine physica

Fit conditione.

3. Dum intrat sublimitas

Carnis limitatem,
Naturae binarius

Gignit unitatem,
Christo Phoebo Cynthia

Dat nativitatem,
In quo mathematicus

Videt novitatem.
4. Dum fecundat coelitus

Imber spiritalis
Hanc, quae fuit nescia

Voti maritalis,
Mutavit mirifice

Cura maternalis
Regimen monasticum

Vitae virginalis.

5. Sumpturas a famula

Fomentales usus
Servae fit hospitio

Dominus inclusus,
Cujus regit omnia

Spiritus diffusas,
Per quod yconomica

Mores est abusus.

6. Qui gubernat omnia

Legibus naturae,
Nascens dum conciliat

Se carni passurae,
Saeviunt in Dominum

Serviles pressurae,
Virtutis politicae

Violato jure.

7. Producit res genita

Suum genitivum,
Ex passivo genere

Genus fit activum,
Sic irregulariter

Et derivativum
Gignit non grammatice

Suum primitivum.

8. Ubi praepotentia

Deitatis ludit,
Patrem sua filia

Virgo partu fudit,
Vanas dialectica

Rationes cudit,
Gignens esse genito

Prius dum concludit.

9. Virgo rore spiritus

Coelitus imbuta
Parit, sic fit rhetoris

Ratio soluta,
Per quam, quod fecunditas

Non sit impolluta,
Arguit negotium

Gestum consecuta.

10. O cujus potentia

Naturam potenter
Immutavit, bonitas

Morem competenter
Et inneffabilitas

Lexin praepatenter,
Nos juvet per gratiam,

Quaesumus, clementer.