Sermo X .

Item, summaria intentio Evangelii secundum Lucam , quod legitur prima Dominica de Adventu secundum ordinem sanctae Romanae Ecclesiae, et praedicavit eam sic decurrendo Evangelium illud frater Bonaventura coram rege Franciae ad petitionem ipsius.

Erunt, inquit, signa in sole et luna et stellis, et in terris pressura gentium prae confusione sonitus maris et fluctuum, Lucae vigesimo primo .

In isto Evangelio, ut per timorem adventus iudicialis unusquisque fidelis disponatur ad celebrandum et recolendum Nativitatem Christi, in qua solemnizatur adventus clementiae sempiternalis, qui factus est per unionem divinae naturae cum humana, Dominus et Salvator noster Iesus, alloquens discipulos in persona omnium electorum, duo principaliter facit.

I. Primo erudit ad providentiam finalium tribulationum, exprimens circa finale iudicium futuram universalem commotionem ex parte naturae caelestis, quia erunt signa, obscurationis, in s ole et luna et stellis.

Ex parte naturae elementaris, quia in terris pressur a gentium prae confusione sonitus maris et fluctuum erit.

Ex parte naturae rationalis humanae, quia arescent homines prae timore et exspectatione, quae supervenient universo orbi.

Ex parte naturae intellectualis angelicae, quia virtutes caelorum commovebuntur.

Ex parte? iudicis apparentis in rutila nube et praecellenti claritate et dignitate, quia tunc videbunt Filium hominis venientem in nube cum potestate magna et maiestate.

II. Secundo erigit ad confidentiam caelestium consolationum, et hoc exhortatione confortatoria sub spe redemptionis appropinquantis; his, inquit, fieri incipientib us , respicite et levate capita vestra, quoniam appropinquat redemptio vestra.

Similitudine manuductoria sub metaphora terrestris pullulationis ficulneae aestatem signantis.

Assertione certificatoria sub nomine caeli et terrae potius periturorum quam verborum horum suorum non implendorum.