11. De Lacrima Christi.

1 a. O lacrima gloriosa,
Super omnes pretiosa
Sanctorum reliquias,

1b. Tu de pio corde Christi
Ad Lazari prodiisti
Plangendas exequias.

2 a. Lazarus quatriduanus
Ligatus pedes et manus
Iacebat in tumulo ;

2 b. Christus illum suscitavit,
Ex amore deploravit
Coram cuncto populo.

3 a. Ab angelo fide plena
Te devota Magdalena
Suscipere meruit.

3 b. Hinc beatus Maximinus
Succedere fuit dignus
Et te caram tenuit.

4 a. Imperator mente sanus
Constantinopolitanus
Te suscepit dulciter.

4 b. Hinc et eius successores,
Sanctae crucis defensores,
Te servarunt pariter.

5 a. Annis Christi mille lapsis
GrexTurcorum dedit Graecis
Exsecrandum proelium ;

5 b. Hos Goffridus comes stravit,
Qui te dehinc asportavit
Ad praesens coenobium,

6 a. Quod ipse iam fundaverat,
Nam de caelis ter viderat
Tres lanceas cadere.

6 b. Inde nomen trinitatis
Et ordinem sanctitatis
Instituit libere.

7 a. Ostenditur causa, quare

Te voluit Deus dare

Isti monasterio.

7 b. Hoc est templum salvatoris,
Cuius es fletus amoris,
Hinc patet translatio.

8 a. Gaude, felix ecclesia,
Vindocinensis patria
Laetare similiter;

8 b. Hanc devote veuerato,
Nam te Christus tali dato
Amat singulariter.

9 a. Eamus nunc et fleamus,
Seminemus et metamus
Portantes manipulos,

9 b. Nostri luctus profluvio
Mereamur in gaudio
Dulces dare modulos.

10 a. In hac valle lacrimarum
Tendamus ad lucem clarum,
Respuamus infima,

10 b. Rogemus Dei filium,
Ut sit nobis auxilium
Eius sancta lacrima.