11. De sanctissima Trinitate.

Ad Matutinum.

1. Pater, fili, paraclite,

Mala vitae praeteritae

Dimitte nobis, quaesumus,

Nam sine te nil possumus.

2. Peccando nos polluimus,

Ut expies, deposcimus,

Ne tuum domicilium

Sit unquam cibus ignium.

3. Trinitas ineffabilis

Et lux inaccessibilis,

Ure per ignem geminum

Nostrarum sordes mentium.

4. Verum lumen ac splendidum,

Cor tepens redde fervidum,

Caecas mentes illuminans

Et mortis umbras terminans_

5. Trinitati sit gloria,

Laus, decus et potentia,

Qui sua nobis gratia

Concedat vitae gaudia.

Ad Laudes.

1. O sancta Deus trinitas,

De qua sanctorum sanctitas,

Te laudamus, sanctifica

Donando nobis caelica.

2. Trinitas ineffabilis

Unitasque laudabilis,

Instantes tuis laudibus

Veris dita muneribus.

3. Cuius in nobis munera

Conservet illa dextera,

Quae benedicet credulos,

Reprobabit incredulos.

4. Trinitas individua,

Nos tua lux perpetua

Et a damnatis segreget

Et cum beatis adgreget.

5. Sit tibi, sancta trinitas,

Decus, honor, sublimitas,

Potestas, dominatio,

Maiestas, collaudatio.

Ad Primam.

1. Pater, creator omnium,

Cuncta creans per filium,

Accepta nostros gemitus

Per donum sancti spiritus.

2. O trinitatis unitas

Et unitatis trinitas,

Pro tuo sancto nomine

Emunda nos a crimine.

3. Nudatos a criminibus

Orna virtutum floribus

Et in polorum sedibus

Fac iungi cum felicibus.

4. Sit laus patri per saecula

Agnoque sine macula,

Sit laus sancto spiritui,

Quo mereamur perfrui.

Ad Tertiam.

1. Caelestium rex agminum,

Fili redemptor hominum,

Consolator maerentium,

Fer miseris solacium.

2. O veneranda trinitas,

Tua nobis benignitas

Succurrat, ne fragilitas

Nos trahat ad res vetitas.

3. Caventes a prohibitis

Utamur bene licitis,

Ut gaudeamus gaudio,

Quo caeli gaudet contio.

4. Trinitati, quam credimus,

Adoramus et colimus,

Sit gratiarum actio,

Salus et benedictio.

Ad Sextam.

1. Genitor ineffabilis,

Ipsius proles parilis,

Paraclito consimilis,

Memento vitae fragilis.

2. Proni sumus et fragiles

Ad peccandum et habiles,

Tua misericordia

Nos levet a miseria.

3. Ex te vitae principium,

Per te vitae remedium,

In te vitae solacium,

Da nobis vitae praemium.

4. Patri cum unigenito

Et spiritu paraclito

Sit maiestas et gloria,

Potestas et victoria.

Ad Nonam.

1. A patre prodit genitus,

Ab utroque paraclitus,

In his est una deitas,

Quam laudat universitas.

2. Ex quo nostra conditio,

Per quem nostra redemptio,

In quo nostra remissio,

Cum hoc fruamur gaudio.

3. Vitam sanctis repositam

Ob artam vitae semitam

Praestet nobis gratuito,

Quam non debet ex merito.

4. Genitori sit gloria,

Redemptori victoria,

Consolatori gratia,

Nobisque per hunc venia.

Ad Vesperas.

1. Deus de nullo veniens,

Deus de Deo prodiens,

Deus ab his progrediens,

Id nos veni subveniens.

2. Tu nostrum desiderium,

Tu sis amor et gaudium,

In te nostra cupiditas

Et in te sit iucunditas.

8. Pater, cunctorum Domine,

Cum genito de virgine

Intus et in circuitu

Nos rege sancto spiritu.

4. Regendo clemens corrige

Et corrigendo dirige,

Diligendo nos eligas

Et cum electis colligas.

5. Memento, sancta trinitas,

Quod tua fecit bonitas

Creando pinus hominem,

Recreando per sanguinem.

6. Nam quos creavit unitas,

Redemit Christi caritas,

Patiendo tunc diligens

Nunc diligat nos eligens.

7. Trinitati sit gaudium,

Pax, virtus et imperium,

Decus, omnipotentia,

Laus, honor, reverentia.

Ad Completorium.

1. Trinitas, lumen luminum,

Illumina cor hominum,

Tuam similitudinem

Reformans et imaginem.

2. Ex te mens nostra fulgeat

Et in te vota compleat,

Ad te per te se dirigat,

Credens, sperans te diligat.

3. Trinitas, salus omnium.

Cor sana male saucium,

Concedens noxis veniam

Per septiformem gratiam.

4. Fac nos ex fide vivere

Et per spem sursum tendere

Et caritatis geminae

Fac nos vestiri tegmine.

5. Patri sit benedictio

Cum coaeterno filio,

Benedictus sit spiritus

Et nos in ipso caelitus.