11. Ad Christum Oratio.

1. Ave, Jesu, splendor patris,
Ave, flos Mariae matris,
Verbum patris increatum,
Alvo matris incarnatum,
Dulcis vitalisque fructus,
Medicina nostri luctus,
Morbos fuga, da virtutem
Mentis, corporis salutem.

2. Ave, sol aeternitatis,
Rex regum, rex majestatis,
Princeps summae largitatis,
Vultu tuae bonitatis
Respice super egenum
Omni foeditate plenum,
Larga manu da petenti
Et ostende te quaerenti.

3. Solum quaero te dilectum
Intra cordis mei lectum,
Non declines sed intende,
Mihi faciem ostende,
Quae est plena gratiarum,
Omnium deliciarum,
Quem videre est amoenum,
Nam suavitate plenum.

4. Ave, Jesu, panis vivus,
Melos, odor, mellis rivus,
Ave, Jesu, pacis donum,
Salus, honor, summum bonum,
Verus Deus, verus homo,
Tibi psallo, tibi promo,
Te collaudo voce, voto,
Ore, cordis nisu toto.

5. Ave, decus angelorum
Gaudiumque supernorum,
Via, veritas et vita,
Lux in coeli regno sita,
Jesu, pacis mediator,
Tu redemptor ac creator,
Semper tu amabilis,
Totus desiderabilis.

6. Ave, speculum sanctorum
Et corona beatorum,
Jesu, pater orphanorum
Et mundator peccatorum,
Te adorans in te credo,
Amor, jubilus, dulcedo,
Ad te clamo toto corde,
Criminum me munda sorde.

7. Ave, agnus immolatus,
Tamquam latro judicatus,
Duris spinis coronatus,
Nudus, caesus, vulneratus,

Passus es, ne patiamur,
Mortuus, ne moriamur ;
Agne Dei, tu spes rei,
Miserere pie mei.
8. Jesu, agonista fortis,
Memor esto tuae mortis;
Mors aeterna non me gravet,
Sanguis tuus foedum lavet,
Mundans intus me ac foris,
Et tu, Jesu, fons amoris,
Cordis tui de piscina
Mihi poculum propina.
9. Cujus haustu creatorem,
Dulcem meum redemptorem,
Diligam te super cuncta
Proximumque lege juncta;
Jesu, mi dilecte, audi
Intendentem tuae laudi
Caritate cum perfecta,
Cum spe firma, fide recta,

10. Sincera cognitione,
Intima contritione
Puraque confessione
Oleique unctione,
Virtutum perfectione,
Tua consolatione,
Dextra tua me defende
Fove, rege, cor accende.

11. Confer mihi finem bonum,
Ut per hoc salutis donum
Merear te summum bonum
Ac coelestis regni thronum ;
Vita, salus, mundi vere,
Jesu, mei miserere ;
Hoc confer salutis munus,
Qui regnas trinus et unus.