Secunda Quinquagena.

1. Ave, Iesu, ad quem fleo,
Dona mihi, lux de Deo,
Ne in corde velim meo
Gloriari ni in Deo.

2. Ave, Iesu, tu amarae

Dulcor mentis, fac me stare,
Te timendo trepidare
Nec in vanum declinare.

3. Ave, Iesu, ad solamen
Mitte nobis sacrum flamen,
Ut sit nobis adiuvamen
Tribulatis et levamen.

4. Ave, Iesu mi colende,
Me exaudi et intende,
Fletu mortis ab horrendae,
Te exoro, me defende.

5. Ave, Iesu, tolle metum,
Cerne malis me repletum,
In conspectu tuo fletum
Pone meum, fac me laetum,

6. Ave, Iesu, lumen clarum.
Mira facis nec est rarum,
Fac foveri sub alarum
Tegumento me tuarum.

7. Ave, Iesu, fac perfecte
Me studere in te recte,
Ne oberrem indirecte
Iustis tuis me connecte.

8. Ave, Iesu, tu me portes
Et bellantem me confortes,
Impiorum, en, cohortes
Irruerunt in me fortes.

9. Ave, Iesu, miseratus
Me infirmum, veni gratus,
Ne repellas me iratus,
Ne sim hosti praeda datus.

10. Ave, salus ex Iudaea,
Turris fortis et spes mea,
In me bonum quodvis crea,
Procul aufer quaeque rea.

11. Ave, Iesu, fide recta

Sursum mea mens subvecta,
Tibi digne sit subiecta,
Cuius dona stat erecta.

12. Ave, Iesu, qui peritas
Hostis fraudes cruce tritas
Atque tuos dote ditas
Meliori super vitas.

13. Ave, Iesu, flos de flore,
Corde peto, precor ore,
Ut me serves pio more
Inimici a timore.

14. Ave, Iesu, mea vota,
Oro, quod sint tibi nota,
Ut dum surgo fraude mota,
Reddam tibi illa vota.

15. Ave, Iesu, terrae, maris
Et astrorum rex vocaris,
Iure tuo non privaris,
Qui virtute dominaris.

16. Ave, Iesu, quem laudamus,
Ut te solum requiramus,
Da, in terra, te rogamus,
Viam tuam cognoscamus.

17. Ave, Iesu, tu virtuti
Manda tuae, qua adiuti
Ab incursu simus tuti
Hostis nequam et versuti.

18. Ave, Iesu, quos in imo
Cernis fixos et in limo,
Leva sursum nos de fimo
Et reforma loco primo.

19. Ave, valde tu serenus,
Iesu dulcis et amoenus,
Ad te malis multis plenus
Clamat pauper et egenus.

20. Ave, Iesu, vas mellitum,
Contra hostem valde tritum,
Mihi locum in munitum
Tu sis et tutorem citum.

21. Ave, Iesu, ad me stilla
De malorum duc favilla,
Ut mens mea sit tranquilla,
Oriatur pax in illa.

22. Ave, Iesu, cruce pressus
Meos, oro, fige gressus,
Ne discurram post excessus,
Sed quiescam in te fessus.

23. Ave, Iesu, creans stellas,
De peccatis me evellas,
Mundi feram ne procellas,
Ne in finem me repellas.

24. Ave, calix vini meri,

Quem non bibunt insinceri,
O mi Iesu, dulcis quaeri,
Fac te cito possideri.

25. Ave, Iesu, non sic tace,
Raptum mundi de fornace
Caritatis ure face,
Ut quiescam sic in pace.

26. Ave, Iesu, virtus pia,
Patris oro te sophia,
Es iucundus multum quia,
Tibi sit cor meum via.

27. Ave, panis angelorum,
Iesu cibus tu ciborum,
A languore me meorum
Refoveto vitiorum.

28. Ave, Iesu, mentes fundans,
Impollutus nos emundans,
Pietatis fons inundans,
Sis me servans et circumdans.

29. Ave, Iesu, pulchrum multum
Nobis praebe tuum vultum,
Et in nobis, quod est stultum,
Ad aeternum reduc cultum.

30. Ave, Iesu ver et aestas,
Omnis subest cui potestas,
Tu te tuis manifestas,
Quando mel et manna praestas.

31. Ave, iudex egenorum
Et defensor pupillorum,
Iesu, Deus tu deorum,
Stans in medio eorum.

32. Ave, Iesu, non tacebis,
Non mutesces, non silebis,
Donec omnes rehabebis
Tuos, post haec quos tenebis.

33. Ave, Iesu, quam beatum,
Quam iucundum quamque

gratum
Ire tecum iam locatum,
O quam felix tale datum.

34. Ave, dator, spei certae,
Ad te, Iesu, nos converte,
Mala nostra tu subverte
Nec a nobis te averte.

35. Ave, fructus tu Mariae
Et calestis vas sophiae,
Fac me laetum, Iesu pie,
Ad te clamo tota die.

36. Ave, Iesu, bonus bonis,
Me de terra Babylonis
Suspirantem caeli thronis
Et sanctorum iunge sonis.

37. Ave, Iesu, tu salutis
Meae Deus et virtutis,
Da cum caelum te secutis
Requiescam locis tutis.

38. Ave, Iesu, in quo stabo,
Adiutorem te vocabo,
Quam sis pius, enarrabo,
In aeternum te cantabo.

39. Ave, Iesu, lux, lucerna,
Locum Dei da, pincerna,
Quo sint pace de superna
Dies mille ut hesterna.

40. Ave, Jesu, dulce merum,
Da, quod opto, fiat verum,
Ut sequatur, factor rerum,
Longitudo me dierum.

41. Ave, Iesu, amor veri
Cui bonum confiteri,
Fac ab hoste non terreri,
Sed in caelis me videri.

42. Ave, Iesu, qui decorem
Induisti post laborem,
Te agnosco creatorem,
Serva tuum laudatorem.

43. Ave, liber actionum
Tuque Deus ultionum,
Iesu bone, fac me bonum,
Hoc largire mihi donum.

44. Ave, cuncta qui creasti,
Terram manu qui fundasti,
Iesu, mortem qui gustasti
Pro mortali, quem amasti.

45. Ave, Iesu, dignus ludo,
Omnis in te pulchritudo
Tuque nostra sanctitudo,
Ex quo nostra fortitudo.

46. Ave, Iesu, pluens nubes,
Tu, rex regum, nulli subes,
In fervore ubi cubes,
Monstra nobis, da, quod iubes.

47. Ave, Iesu, dignus laude,
Vincens hostem plenum fraude,
Terra ergo omnis gaude
Atque manu simul plaude.

48. Ave, Iesu, nos heredes
Tuos eaeli duc ad aedes,
Super Cherubim qui sedes
Nec abinde tu recedes.

49. Ave, qui de vera vite
In spem manas, Iesu, vitae
Eius, gentes, introite
In conspectum et servite.

50. Ave, Iesu, tu lux grata,
Caecitati nostrae data,
Luce frui nos optata
Via fac immaculata.