13.

De S. Andrea.

1. Andreae, Petri germano,

Excellenti piscatori,

Digno laude pulchriori,

Laudes stylo rudi cano,

Cujus nomen nunquam mori

Debet, et actus decori

Florebunt In coeli plano

Peracto cursu mundano

Factus fit coelestis chori

Civis, junctus salvatori,

2. Juxta mare Galilaeae

Dum salvator ambulavit,

Andream navis servavit,

Et Petrum. fratrem Andreae,

Quos dum Jesus advocavit,

Venite post me, clamavit,

Faciam vos gentis meae

Piscatores, ad plateae

Vias uterque saltavit

Et se Christo sociavit.

3. Ab Andrea fit abjectus

Remus et dimissa ratis

Sequiturque veri vatis

Vocem tamquam vir perfectus:

Hinc a Domino fit satis

Odore suavitatis

Specialiter electus

Ut vir simplex, justus, rectus

Et obediens mandatis,

Christi monitisque gratis.

4. Seminavit verbum Dei

Tamquam amicus fidelis

Dicens, Dominum de caelis

Advenisse, quem Judaei

Adhuc apertis loquelis

Negant, voce Gabrielis

Fore conceptum, sed ei

Joseph dant patrem, hinc rei

Dirae mortis et crudelis

Erunt In Inferno prelis.

5. Non credentes ab errore

Revocare nitebatur,

Sicut fecit, ut testatur,

Ejus vita plena rore

Sanctitatis, revocatur

Multa gens et baptizatur;

Hinc Aegeas ursi more

Insanit, plenus furore,

Crux amara praeparatur,

Ut Andreas suspendatur.

6. Visa cruce jam gavisus

Fit Andreas laeta mente,

Et cum animo fervente

Sponte velle mori visus,

Salve crux, ait repente,

In qua Christo moriente

Est apertus paradisus,

Et datus pro luctu risus ;

Ad crucem non currit lente

Vultu laeto, non timente.

7. Funibus simul contortis

Alligatur cruci dirae,

Et dum gentes Impedire

Vellent poenam suae mortis.

Tendens praedicavit mire,

Praecepit eas abire,

Deum ut athleta fortis,

Et clarum a coeli portis

Lumen visum est venire,

Dum vitam coepit fiuire.

8. Sic Intravit portas poli,

Ubi modo requiescit,

Nec non timet nec pavescit

Ullas poenas hujus soli,

Magis contristari nescit,

Sed cum claritate crescit

Conjunctus Mariae proli

Radianti compar soli,

Quando lucet et splendescit.

Ut In aestate consuescit.