12. Cursus de sancta Trinitate.
Ad Matutinum.

1. In matutinis, Domine,
Dum tibi ore canimus,
Caelestium pinguedine
Mox repleatur animus.

2. Ad te de luce vigilet
Cor nostrum desideriis,
In te mens nostra iubilet,
Dum te laudamus labiis.

3. Uni trinoque Domino
Sit sempiterna gloria,
Qui vitam sine termino
Nobis donet in patria.

Ad Laudes.

1. Precamur, sancta trinitas,
Te elevatis manibus,
Veraque simplex deitas,
Nostris intende precibus.

2. O lux inacessibilis,
Illustra nos perspicue,
Solus invariabilis,
Conforta nos assidue.

3. Voluntas nostra cupiat,
Mens meditetur iugiter,
Te summum bonum sapiat
Synderesis veraciter.

4. O Deus, decus gloriae,
O Deus exercituum,
Nos benedicas hodie,
Nos salva in perpetuum.

5. Uni trinoque Domino.

Ad Primam.

1. Te vere, summa trinitas,
Spes nostra, fides, caritas,
Unum fatemur Dominum
Personas trium nominum,

2. Aequalis esse gloriae
Eiusdemque substantiae
Cum patre unigenitum
Ac utriusque spiritum.

3. Honor patri, laus genito,
Sit gloria paraclito,
Qui frui nol)is omnibus
Se donet in caelestibus.

Ad Tertiam.

1. Nunc omnes gentes, populi,
Tribus et linguae singuli,
Senes cum iunioribus,
Pusilli cum maioribus,

2. Cuncti laudemus inclitum
Patrem, natum, paraclitum,
Eius misericordia
Ut firmet nos in gratia.

3. Honor patri, laus genito.
Ad Sextam.

1. O Adonai Domine,

Regnans in caeli culmine,
Per tuum admirabile
Nomen et ineffabile

2. Tuam similitudinem
In nobis et imaginem.
Infectam culpa, reparu,
Ad te fruendum praepara.

3. Honor patri, laus genito.
Ad Nonam.

1. In psalmis, hymnis, canticis
Te iubilantes melicis
Deum laudamus pariter,
Unum trinum alacriter.

2. Conserva nos in gratia
Et semper cum laetitia
Tibi servire tribue
Cunctamque noxam dilue.

3. Honor patri, laus genito.
Ad Vesperas.

1. O filii ecclesiae,

Deum laudemus iugiter,
Ut verae pacis requie
Fruamur aeternaliter.

2. Emitte verbum, Domine,
Ut corda liquefaciat
Et flante sacro flamine
Fletum amoris pariat.

3, O summa vere trinitas,
Verbum, pater, paraclite,
O vere summa bonitas,
Remunerator inclite,

4. Post spem da rem percipere,
Post fidem frui specie,
Perfecteque diligere
Fac nos te regem gloriae.

5. Uni trinoque Domino.

Ad Completorium.

1. O pater, nate, spiritus,
Nostros exaudi gemitus,
Propitius accelera
Et nos ab hoste libera.

2. A peccatorum foveis,
Ab inimici laqueis
Educ nos, une Domine,
In trinitatis nomine.

3. Honor patri, laus genito.

Vi. De sanctissima Trinitate.

O qualem, quantum, quam magnum, quam venerandum,
O quam formosum, quam pulchrum, quam decorosum,
Regem regnantem, media de sede tonantem,
Altithronum Dominum, sub personis tribus unum,
Omnia complentem, caelos terrasque tenentem I
Es, per et in quo sunt, vivunt simul omnia, quae sunt,
Cui sedes caelum, cui terra profunda scabellum,
Cui nemo mundus, non iustificabitur ullus,
Quem grex sanctorum, virtus praecelsa polorum,
Quem vicenorum plebs quattuor et seniorum
Semper glorificat, semper collaudat, honorat,
Semper adorando, venerando, colendo, tremendo,
Semper cernentes, quod semper erant cupientes,
Semper captantes, quod semper erant adamantes,
Saepius optatam vitam sine fine beatam.