12. Novena gratiarum actio.

1. Ad beatae trinitatis

Simplicisque deitatis

Sempiternam gloriam

Recolendo, Jesu Christe,

Cujus laudis hymnus iste

Personat victoriam,

2. Grates tibi pro tuorum

Reddo beneficiorum

Nobis facta gratia,

Orans, ut, qui minus grati

Tibi, simus excusati

Pro tua clementia.

3. Jesu pie, Jesu bone,

Qua possum devotione,

Te rogo suppliciter,

Corda nostra ad orandum

Et os ad te salutandum

Aptes efficaciter.

4. Primum ergo te laudare

Decet ab hoc et amare,

Quod de carne virginis

Incarnari voluisti,

Incarnatus induisti

Veri formam hominis.

5. Propter hanc humilitatem,

Qua sic tuam majestatem

Inclinasti, Domine,

Fac nos tibi semper esse

Humiles ut est necesse

Et mundos a crimine.

6. Nunc secundo collaudandus

Et a cunctis praedicandus

Es, Jesu dulcissime,

Quod cum Deus ab aeterno

Sis cum patre, de materno

Virginis castissimae

7. Es dignatus ventre nasci

Et ejusdem lacte pasci

Natus mirabiliter.

Per illam nativitatem

Da, ut tuam claritatem

Cernamus perenniter.

8. Tertio nunc honorari

Debes et magnificari,

Christe, a fidelibus

Eo quod in mundo natus,

Circumcisus, adoratus

Magorum muneribus,

9. Templo patri praesentatus,

Baptizatus et temptatus,

Clarus in miraculis,

Jejunasti, laborasti,

Discurrendo praedicasti

Verbum vitae parvulis.

10. Quarto tibi grates ago,

Splendor patris et imago,

Pro poenis innumeris,

Quas in carne consecrasti,

Post et antequam portasti,

Crucem sacris humeris.

11. Te Judaei flagellabant

Et acerbis vulnerabant

Flagris crudelissime,

Te frementes conspuebant,

Deridentes illudebant

Tractando vilissime.

12. Tibi vultum velaverunt

Colaphisque ceciderunt

Faciem clarissimam,

Tibi vestes detraxerunt,

Spoliantes nudaverunt

Carnem sacratissimam.

13. Tibi crucem praeparantes

Et in ipsam te levantes

Blasphemando nequiter,

Inter fures suspenderant,

Manus, pedes confixerunt

Cruci clavis fortiter.

14. Caput spinis coronatur,

Latus tibi perforatur

Et inflicto vulnere,

Totus poenis es afflictus,

Morti dirae es addictus

Pro humano scelere.

15. Per plagas, quas pertulisti,

Per cruorem, quem fudisti,

Te rogo, rex gloriae,

Ut qui fons es pietatis,

Nobis dones de peccatis

Spem et actum veniae.

16. Quinto tibi laus est danda,

Mundi salus adoranda,

Quod morte ad inferos

Jam devicta descendisti

Et captivos redemisti

Liberando miseros.

17. In sepulchro jacuisti,

Sed ad vitam surrexisti

De morte post biduum ;

Vitam nobis morituris,

Regnum nobis surrecturis

Concede perpetuum.

18. Sexto tibi reddo grates,

Qui, ut praedixerunt vates,

In coelum ascenderas,

Quod tunc vere complevisti,

Cum in coelum transvexisti

Carnem, quam assumpseras.

19. Per illam ascensionem

Et tuam per sessionem

In paterna dextera,

Fac nos ad te transportari

Et post mortem gloriari

Tecum super aethera.

20. Septimo laus tibi detur

Et semper continuetur

Omnibus in saeculis

Propter donum, quod electis

Tuis sanctis et dilectis

Misisti discipulis.

21. Sanctum eis qui dedisti

Spiritum, quos docuisti

Loqui linguis omnium,

Tuum nobis sanctum flamen

Dona, precor, ut tutamen

Contra fraudes hostium.

22. Octavo tu venerandus

Et obnixe praedicandus

Es, redemptor omnium,

Ut cum dies erit durus,

Quando crederis venturus

Esse ad judicium,

23. Ubi facta singulorum

Tam bonorum quam malorum

Pensabis aequissime,

Horum, quibus dices Ite,

Non simus tunc, sed Venite

Dic nobis dulcissime.

24. Nono laude hac es dignus,

Christe, quod tu es benignus

Vere poenitentibus,

Fidem tuam qui professi

Et peccata sunt confessi,

Reddis cum operibus.

25. Nobis fidem praebe veram,

Caritatem da sinceram

Et spem certam tribue

Et mundatos a peccatis

Nos in regno claritatis

Post mortem constitue.

26. Jesu pie, Jesu bone,

Qua possum devotione

Te rogo suppliciter,

Corda nostra ad orandum

Et os ad te salutandum

Aptes efficaciter.