CAPUT I.

De doni nobilitate.

In ipso autem dono sacramenti hujus quatuor notanda esse occurrunt, scilicet doni nobilitas, doni sufficientissima copiositas, et doni utilitas, et quarto, doni hujus ad donantem conformitas.

Propter quod semper etiam memoria habetur in dono, et de nobilitate est pretiositas et electio doni : quia nobile pretiosum est et electum. Hoc est enim illud donum de quo dicitur, Sapient. III, 14 : Dabitur enim illi fidei donum electum, et sors in templo Domitii acceptissima. Quamvis enim multa sint fidei dona, tamen hoc donum prae omnibus fidei donum est, in quo tanta sunt fidei fundamenta : quia in hoc dono et fides Christi fundatur, et fideles sanctificantur : et ideo ex omnibus est donum electum, et magnum fidei sacramentum, quo donatum est fidelibus. Et est istud donum tota sors fidelium acceptissima, in qua omnes acceptantur in templo Domini, in quo donum offertur, et ad cujus oblationem totum Ecclesiae templum sanctificatur, dicente Patre ad Filium, Isa. lvi, 7 : Holocausta eorum et victimae eorum placebunt mihi super altari meo : quia in hoc dono omnia alia munera fiunt accepta, in quo Filius offertur Patri, et in Filio nobis sic dato omnes nos ipsi dono communicantes acceptantur, dicente, Isa. lx, 7 : Offerentur super placabili altari meo, et donum majestatis meae glorificabo. Hoc enim bono nobili pretioso et electo tota domus divinae majestatis et exaltatur et glorificatur. Propter quod, Aggai, ii, 10, dicitur : Magna erit gloria domus hujus novissimae plusquam primae. Quia nullum tale donum in aurato templo synagogae fuit, quantum est istud donum in domo templi Dei fidelibus donatum.Unde, I Petri, I, 18 et 19, dicitur :Non corruptibilibus auro vel argento redempti estis de vana vestra conversatione paternae traditionis, sed pretioso sanguine quasi agni immaculati Christi, et incontaminati. Quod tractans Joannes Chrysostomus in Originali super Joannem, xiii, dicit :

" Sicut homo auro servos emit, et servos quos honorare vult, mundat et ornat : ita Dominus noster nos et sanguine mundavit et ornavit. " Et Ambrosius in libro de Virginitate loquens de sancta Agnete, dixit: " Ab alio amatore praeventa sum : quia mihi satis meliora te obtulit ornamenta : jam corpus ejus corpori meo sociatum est, et sanguis ejus ornavit genas meas. " Hic est enim de quo dicitur, Cantic. v, 10, quod est candidus et rubicundus, electus ex millibus. Est donum istud in candore cibi immaculati confecti ex adipe candidissimi frumenti, et rubore pretiosi sanguinis ex uva sui corporis expressum. Unde, Genes. xlix, 11, secundum translationem Septuaginta, legitur : Lavitvino stolam suam, et in sanguine uvae et olivae pallium suum. Hoc ergo est donum, quod nobilitate suae pretiositatis est ex omnibus electum. , Hoc est etiam donum, quod sui pretiositate a multis est absconditum et amicissimis datum, de quo dicitur, Proverb. XXI, 14 : Munus absconditum exstinguit iras, et donum in sinu indignationem

maximam. Omnem enim iram et indignationem Dei hoc pretiosissimo dono exstinguimus : hoc enim munus omnes qui Deum placare quaerimus, offerimus tam pro vivis quam pro mortuis. Unde dicitur, Sophoniae, id, 10 et 11 : Filii dispersorum meorum deferent munus mihi. In die illa non confunderis super cunctis adinventionibus tuis, quibus praevaricata es in me, quia tunc auferam de medio tui magniloquos superbiae tuae, et non adjicies exaltari amplius in monte sancto meo Ac si dicat : Tam pretiosum munus mihi offers, non tuum, sed a me tibi datum, quod remittam tibi omnes tuas adinventiones peccatorum, et non imputabo tibi eas ad confusionem : et adeo vincet te magnificentia et pretiositas muneris, quod ultra de te magna non senties, nec in superbia magna loqueris, nec exaltaberis in corde magna de te sciens : sed de me magna dices, qui tali te munere magnificavi. Hoc enim tantum est munus, quod omnem nostram vincit jactantiam, et dignum donum Deo est sua nobilitate.