13. Oratio devota et compunctiva.

1. Ave regis angelorum,

Dei patris unice,
Mundi faber et coelorum

Rex et rector fabricae,
Jesu, vota miserorum

Te laudantum respice.
2. Aequum est et salutare,

Te laudare dominum,
Cui laudes dignas dare

Nullus potest hominum,
Duxi tamen te laudare

Homo plenus criminum.

3. Homo miser et malignus,

Plenus omni scelere,
Tibi, Jesu, non sum dignus

Vota laudum solvere,
Sed es clemens et benignus,

Noli me contemnere.
4. Te adoro, mi creator,

Tuo factus numine,
Te collaudo, mediator,

Tuus vocor nomine,
Te saluto, mi salvator,

Tuo emptus sanguine.

5. Salve, fili Dei Deus,

Splendor patris gloriae,

Vita mea, Deus meus,
Amor et deliciae,

Tibi laudes licet caenus
Cantabo quotidie.

6. Ave, fuga tenebrarum,
Solis lux et siderum,

Jesu, salus animarum,
Medicina scelerum,

In hac valle lacrimarum
Respice me miserum.

7. Vale, vita beatorum,
Jesu, pacis visio,
Via vitae, spes lapsorum,

Reorum redemptio,

Ad te miser peccatorum

Mole pressus fugio.

8. Jesu, virtus deitatis,
Patris sapientia,
Tu es dextra majestatis,

Par patris potentia,
Auctor universitatis,
Rex et regens omnia.

9. Tu es splendor et figura
Paternae substantiae,

Verbum factum caro pura,
Carnis carens carie,

Et creator creaturae
David ex progenie.

10. Tu es mitis et severus,
Humilis altissimus,

Agnus mitis, leo feras,
Clementer justissimus,

Deus fortis, homo verus,
Potenter piissimus.

11. Tu es judex veritatis,

Fons tamen clementiae,

Deus fortis, judex pacis,
Rex tamen justitiae,

Vindex justus pravitatis,
Vena tamen veniae.

12. Tu es novae lator legis
Et largitor veteris,

Rex et natus summi regis,
Descendens a superis

Ovem ad ovile gregis
Portas tu in humeris.

13. Tu peccati poenitudo,

Reatus remedium,
Tu erroris rectitudo,

Doloris refugium,
Tu amoris plenitudo,

Pudoris connubium.

14. Tu es pacis gratitudo,

Amoris justitia,
Tu in via fortitudo,

Praemium in patria,
Sanctorum beatitudo,

Angelorum gloria.

15. Tu es legis plenitudo,
Gratiae tu largitas,
Fidei tu fortitudo,

Tu spei profunditas,
Caritatis latitudo,
Via, vita, veritas.

16. Tibi, Jesu, creatori

Detur benedictio,
Tibi, Jesu, salvatori

Gratiarum actio,
Tibi, Jesu, redemptori

Honor et salvatio.

17. Tibi, Jesu, confiteri

Bonum est et psallere,
Modus cujus est mederi,

Usus est ignoscere,
Jus naturae misereri
Et volantas parcere.

18. Non est onus ita grave
Ut peccati sarcina,

Corpus enim premit prave,
Cordis caecans lumina

Mentem ducit in vae a vae
Et offendit numina.

19. Heu, quid agam, toti mundo
Vilescens obsurdui,

Coetu coeli laetabundo
Non sum dignus perfrui,

Solam Stygis in profundo
Mansionem merui.

20. Omnem mundum maculavi
Meam per libidinem,
Tanta mala perpetravi,

Quod ob multitudinem
Intueri jam expavi
Coeli celsitudinem.

21. Quos infeci, me diffamant
Aer, tellus, maria,

Accusantes me proclamant,
Cor et conscientia,

Et quos amo, me non amant,
Sed nec caro propria.

22. Vilis atque vitiosus

Cunctis sum viventibus,

Horror, stupor et exosus
Brutis et hominibus,

Et amiois onerosus,
Fuga fio fratribus.

23. Me mirante cum stupore,
Cum tanta miseria,

Me adjicit cum moerore
Mens malorum conscia,

Quod offensa creatore
Offenduntur omnia.

24. Ecce, qui te, creatorem

Offendisse videor,
Adsum et me peccatorem

Coram te confiteor
Ac me negans, ut errorem

Emendam, polliceor.

25. Nam non solum morti datus
Intra domum jaceo

Neque tantum deportatus
Extra portas putreo,

Sed jam diu tumulatus
Putrefactus foeteo.

26. Sum peccator criminosus,

Elatus et avidus,
Leno quidem et gulosus,

Iracundus, invidus,
Segnis et acediosus,

Totus olens, horridus.

27. Sum peccator sorde plenus

Septiformis vitii,
Perpetravi omne genus

Faecis et flagitii,
Totus olens et obscaenus

Sponte lapsus perii.

28. Sum peccator et avarus

Saturari nescius,
Parcus, tenax et amarus,

Irascens et anxius,
Boni expers et ignarus

Omnis mali conscius.

29. Sum peccator et impurus,
Vilis, horrens, horridus,

Sum distractor et perjurus,
Mendax, fallax, perfidus,

Mente ferox, corde durus,
Contumax et turbidus.

30. Sum peccator, sum iniquus,
Impius, impatiens,

Litis auctor, inimicus
Pacis, inobediens,

Sum infelix illa ficus
Fructum ferre nesciens.

31. Voto atque cogitatu,
Corde, ore, opere,

Aure, gustu, odoratu,
Manu tangens temere,

Quando reus sum reatu,
Nesciens deponere.

32. Curam carnis semper egi,
Vota cordis condidi,

Adversando semper legi,
Caritatem perdidi,

Sed si quando fidem fregi,
Semper in te credidi.

3-3. Sono, nutu et per signa

Perpetravi noxia,
Magna nimis et maligna

Commisi flagitia,
Quae narrata sunt indigna,

Numeratu nimia.

34. Peccans in spe provocavi
Te ad iracundiam,

Nunquam tamen desperavi
Nec despero, quoniam

Nomen tuum non negavi
Nec misericordiam.

35. O spes mea, Jesu bone,
Fons misericordiae,

Adsis mihi in agone
Instantis angustiae,

Da solamen et depone
Nubem diffidentiae.

36. Fili Dei, Jesu pie,

Deus, qui fecisti me,
Fili virginis Mariae,

Homo redemisti me,
Geminae gigas usiae,
Salvator, exaudi me.

37. Verbi tui dulcis oris

Memento, quod dixeris:

Nolo mortem peccatoris,
Sed ut viam sceleris

Derelinquat, et erroris
Obliviscar veteris.

38. Me, creator, convertentem
Miserator suscipe,

Me, redemptor, poenitentem
Ignoscendo eripe,

Me, salvator, confitentem
A peccatis eripe.

39. Qui peccantem convertisti
Me ad poenitentiam

Et converso contulisti
Confidendi gratiam,

Confitenti corde tristi
Non negabis veniam.

40. Dulcis Jesu, qui es natus
Ex Maria virgine,
Verus homo, qui es datus

In cruce pro homine,
Sordes meas et reatus
Terge tuo sanguine.

41. Memento, quod carnis jura
Nostraequondam sumpseris,
Quod creator creatura
Pro nobis efficeris
Et quod factor pro factura
Mortem crucis tuleris.

42. Deus unus tu et pater
Cum sitis essentia,

Et te parit mihi mater,
Virgo viri nescia,

Deus meus es et frater
In carnis substantia.

43. Si me mei creatoris
Abhorret divinitas,

Fratris mei salvatoris
Non odit humanitas,

Nec me mei redemptoris
Negabit benignitas.

44. Memor esto, quod creando
Me fecisti filium
Et te mihi haec mirando

Fratrem facis proprium,
Ne me perdas condemnando
Mortis tuae pretium.

45. Quia plecti, quae peccavi,
Per me non sufficio,

Indulgebit, quod erravi,
Patris miseratio,

Et quas poenas comparavi,
Solvet fratris passio.

46. Apud patrem plus meretur

Insontis justitia,
Apud te plus, ut videtur,

Potest poenitentia,
Nam quod a te plus ametur,

Probant subsequentia.

47. Numquid merita sanctorum
Sanctitatis opere,
Annon amor miseroram
Lugentum in carcere
Te coegit, rex coelorum,
Ad terram descendere?

48. Potest insons te factorem
Aliquis inspicere,

Sed te reus redemptorem
Potest plus diligere,

Cum sis amor, amatorem
Non potes repellere.

49. Nam te teste tu dixisti,
Non justos ad gloriam
Ut vocares, non venisti,
Sed ad poenitentiam
Peccatores, quos traxisti
Per amoris gratiam.

50. Plus amare nunc probatur,
Cui plus dimittitur,

Et plus amans plus amatur;
Cur? quia redimitur,

Nam quod care comparatur,
Carius diligitur.

51. Age, Jesu, quaeso mitis,
Qui errantes respicis

Et conversis et contritis
Te dare non despicis,

Miserere Sunamitis,
Sed jam tui supplicis.

52. Jesu, meta medicinae,
Miserum me visita

Et a vinclo mortis trinae
Me foetentem suscita

Et da vitam sine fine
Pietate solita.

53. Mihi reo miserere

Atque cunctis miseris,
In praesenti nos tuere
Et post diem funeris
In futuro fac gaudere
Perpetim cum superis.