Proph. XIV. Magnum in ecclesia schisma et tribulationem futuram.

Paulo ante mortem convocatos fratres de tribulationibus futuris admonuit dicens: " Viriliter agite, fratres, confortemini et sustinete Dominum. Magnae tribulationis et afflictionis adesse festinant tempora, in quibus temporaliter et spiritualiter perplexitates et discrimina inundabunt, charitas multorum refrigescet, et superabundabit malorum iniquitas. Daemonum potestas plus solito solvetur, nostrae religionis et aliarum puritas immaculata deformabitur in tantum, quod vero Summo Pontifici et ecclesiae Romanae paucissimi ex Christianis vero corde et charitate perfecta obedient. Aliquis non canonice electus, in articulo tribulationis illius ad Papatum assumptus, multis mortem sui erroris sagacitate propinare molietur. Tunc multiplicabuntur scandala, nostra dividetur religio, plures ex aliis omnino frangentur, eo quod non contradicent, sed consentient errori. Erunt opiniones et schismata tot et tanta in populo et in religiosis et in clero quod, nisi abbreviarentur dies illi juxta verbum evangelicum, si fieri posset, in errorem inducerentur etiam electi, nisi in tanto turbine ex immensa misericordia Dei regerentur. Regula et vita nostra tunc a quibusdam acerrime impugnabitur. Supervenient tentationes immensae. Qui tunc fuerint probati, accipient coronam vitae. Vae autem illis, qui de sola spe religionis confisi tepescent, non resistent constanter tentationibus ad probationem electorum permissis. Qui vero spiritu ferventes ex charitate et zelo veritatis adhaerebunt pietati, tanquam inobedientes et schismatici persecutionem et injurias sustinebunt; nam persequentes eos a malignis spiritibus agitati magnum esse obsequium Dei discent tam pestilentes homines interficere et delere de terra. Erit autem tunc refugium afflictis Dominus et salvabit eos, quia speraverunt in eo. Et ut suo capiti conformentur, fiducialiter agent et per mortem vitam mercantes aeternam obedire Deo magis, quam hominibus eligentet mortem, nolentes consentire falsitati et perfidiae, nullatenus formidabunt. Veritas tunc a quibusdam praedicatoribus operietur silentio, ab aliis concultata negabitur. Vitae sanctitas a suis professoribus habebitur in derisum, quare dignum non pastorem, sed exterminatorem mittet illis Dominus Jesus Christus. "