15.

1. Verbum pater exhibuit

Promissum ab initio,
Nobis quod pandi voluit

In virginali gremio,
Procedit de principio

Principium, quod induit
Carnem, quam mori statuit

Primae matris suggestio.
2. Primae matris suggestio

Portas mortis apperuit,
Quas dato nobis filio

Secunda mater obstruit,

Nos relegatos tenuit
Primae parentis actio,
Reversos postliminio

Secunda quos restituit.
3. Secunda nos restituit

Ereptos a tyrannide
Tyranni, cui supposuit

Nos gula matris avidae,

Quae dum se magis invide
In altum tolli censuit,
A bono vitae corruit

Ad malum mortis languidae.

4. Ad malum mortis languidae
Languentes nos prostituit

Mala matris improvidae,
Quae mali causam praebuit,
Quia malum disposuit

Male malorum cupidae,

Quando serpentis callidae
Voci fidem adhibuit.
5. Voci fidem adhibuit

Hosti humani generis

Eva mater, quo meruit
Culpae reatum veteris,
Verum non sui sceleris

Poenae sola succubuit,

Uvam acerbam sorbuit,
Dentes stupescunt posteris.
6. Dentes stupescunt posteris
Ex uva, quam absorbuit

Mater corrupti foederis,
Sed quod edendo nocuit,
Virgo credendo diluit,

Per quam misertus hominis

Nudatis luto lateris
Verbum pater exhibuit.