16.

1, Purgator criminum

De patris dextera

Venit ad hominum

Sananda vulnera ;

Agnosce Dominum,

Judaea misera,

Lex habet terminum,

Recedunt vetera,

Non mundat scelera

Ritus libaminum

Nec legis litera.

2. O gentis simplicis

Cor plus quam ferreum,

Amurcam respicis

Nec vides oleum,

In esu corticis

Non gustas nucleum,

De granis eiicis

Panem furfureum

Nec imples horreum,

Frumentis mysticis

Praeponens hordeum.

3. Homo reptitius

Salivam exspuit,

Humoris fluvius

In barbam defluit,

Nam Dei filius

Infirmam induit

Carnem exterius

Pravaque imbuit,

Per hoc, quod latuit,

Deus interius,

Quae non deseruit.

4. Occurrens veritas

Misericordiae,

Pacisque bonitas

Juncta justitiae,

Res prius perditas

Reformat hodie,

Dum latet deitas

In servi specie,

Sic Babyloniae

Redit captivitas

Ad domum patriae.

5. Jam servi servitus

Cessat ergastuli,

Et liber exitus

Jam patet exsuli,

Nam missa coelitus

Salus est saeculi,

Qui sibi primitus

Fuerant aemuli,

Junguntur populi,

Lapis est positus

In caput anguli.