Quotidiana beati patris oratio.

Deus meus et omnia, qui es tu, dulcissime Domine, Deus meus, et quis sum ego vermiculus servus tuus? Sanctissime Domine, vellem te diligere, dulcissime Domine, vellem te diligere, Domine Deus, ego vobis totum cor meum et corpus meum dedi et vehementer desidero, si tamen scire possem, pro vestro amore plura facere.

Beati patris testamentum.

Conversio Francisci, fides ejus, reverentia ejus erga sacerdotes et pictas erga Sacramentum, a Domino edoctus ordinem constituit, vita fratrum, hortatur eos, ut assidue laborent, ut paupertatem diligant, privilegia fugiant, commendat omnibus obedientiam et clericis insuper officium. Quae dicit, non est alia regula, sed quaedam tantum ad eam strictius observandam exhortatio. Qui in fraternitate praepositi sunt, caveant, ne regulae addant quidquam aut tollant.

Dominus ita dedit mihi fratri Francisco incipere facere poenitentiam, quia, cum essem in peccatis, nimis mihi videbatur amarum videre leprosos; sed ipse Dominus adduxit me inter illos, et feci misericordiam cum illis. Et recedente me ab ipsis id, quod videbatur mihi amarum, conversum fuit mihi in dulcedinem animae et corporis. Et postea parum steti et exivi de saeculo. Et Dominus dedit mihi talem fidem in ecclesiis suis, ut ita simpliciter adorarem et dicerem: Adoramus te, sanctissime Domine Jesu Christe, hic et ad omnes ecclesias tuas, quae sunt in toto mundo, et benedicimus tibi, quia per sanctam crucem tuam redemisti mundum. Postea dedit mihi Dominus et dat tantam fidem in sacerdotibus, qui vivunt secundum formam sanctae Romanae ecclesiae, propter ordinem ipsorum, quod, si facerent mihi persecutionem, volo recurrere ad ipsos. Et si haberem tantam sapientiam, quantam Salomon habuit, et invenirem pauperculos sacerdotes hujus saeculi, in ecclesiis, in quibus morantur, nolo praedicare contra volunlatem ipsorum. Et ipsos et omnes alios volo timere, amare et honorare sicut meos dominos. Et nolo in ipsis considerare peccatum, quia Filium Dei cerno in ipsis, et homini mei sunt. Haec propter hoc facio, quia nihil video corporaliter in hoc saeculo de ipso altissimo Filio Dei. nisi sanctissimum corpus et sanguinem suum, quod ipsi recipiunt et ipsi soli aliis administrant. Et haec sanctissima mysteria volo super omnia honorari et venerari et in locis pretiosis collocari. Sanctissima nomina et verba ejus scripta, ubicunque invenero in locis illicitis, volo colligere et rogo, quod colligantur et in loco honesto collocentur. Et omnes theologos, et qui ministrant nobis sanctissima verba divina, debemus honorare et venerari sicut eos, qui ministrant nobis spiritum et vitam. Et postquam Dominus dedit mihi curam de fratribus, nemo ostendebat mihi, quid deberem facere, sed ipse Altissimus revelavit mihi, quod deberem vivere secundum formam sancti evangelii. Et ego paucis verbis et simplicibus feci scribi, et dominus papa confirmavit mihi. Et illi, qui veniebant ad recipiendum vitam istam, omnia, quae habere poterant, pauperibus erogabant. Et erant contenti tunica una, intus et foris repeciata, qui volebant, cum cingulo et braccis, et nolebamus plus habere. Officium dicebamus nos clerici secundum alios clericos, laici dicebant Pater noster. Et satis libenter manebamus in ecclesiis pauperculis et derelictis, et eramus idiotae et subditi omnibus. Et ego manibus meis laborabam et volo laborare, et omnes alit fraires firmiter volo, quod laborent de laboritio, quod pertinet ad honestatem. Et qui nesciunt, discant, non propter cupiditatem recipiendi pretium laboris, sed propter bonum exemplum et ad repellendum otiositatem. Et quando non daretur nobis pretium laboris, recurramus ad mensam Domini, petendo eleemosynam ostiatim. Salutationem hanc revelavit mihi Dominus, ut diceremus: Dominus det tibi pacem. Caveant sibi fratres, ut ecclesias et habitacula et omnia alia, quae pro ipsis construuntur, penitus non recipiant, nisi essent, sicut decet sanctam paupertatem, quam in regula promisimus, semper ibi hospitantes sicut advenae et peregrini. Praecipio firmiter per obedientiam fratribus universis, quod, ubicunque sunt, non audeant petere aliquam literam in Curia Romana per se nec per interpositam personam, nec pro ecclesia nec pro alio loco, neque sub specie praedicationis neque pro persecutione suorum corporum, sed ubicunque non fuerint recepti, fugiant ad aliam terram ad faciendum poenitentiam cum benedictione Dei. Et firmiter volo obedire generali ministro hujus fraternitatis et illi guardiano, quem sibi placuerit mihi dare. Et ita volo esse captus in manibus suis, ut non possim ire vel facere contra voluntatem suam, quia dominus meus est. Et quamvis sim simplex et infirmus, tamen semper volo habere clericum, qui mihi faciat officium, sicut in regula continetur. Et omnes alii fratres ita teneantur firmiter obedire guardianis suis et facere officium secundum regulam. Et si aliqui inventi essent, qui non facerent officium secundum regulam et vellent alio modo variare aut non essent catholici, omnes fratres, ubicunque sunt, per obedientiam teneantur, quod, ubicunque invenerint aliquem ipsorum, proximiori custodi illius loci, ubi ipsum invenerint, debeant praesentare. Et custos teneatur per obedientiam ipsum firmiter custodire, sicut hominem in vinculis die noctuque, ita quod non possit eripi de manibus suis, donec in propria sua persona ipsum repraesentet in manibus sui ministri. Et minister teneatur firmiter per obedientiam mittere ipsum per tales fratres, qui die noctuque custodiant ipsum sicut hominem in vinculis, donec repraesentent ipsum coram domino ostiensi, qui est dominus protector et corrector istius fraternitatis.

Et non dicant fratres: Haec est alia regula, quia haec est recordatio, admonitio et exhortatio, meum testamentum, quod ego frater Franciscus parvulus vester facio vobis fratribus meis benedictis propter hoc. ut regulam, quam

Domino promisimus, melius catholice observemus. Et generalis minister et omnes alii ministri et custodes per obedientiam teneantur in istis verbis non addere vel minuere. Et semper hoc scriplum habeant secum juxta regulam, et in omnibus capitulis, quae facient, quando legunt regulam, legant et ista verba. Et omnibus fratribus meis clericis et laicis praecipio firmiter per obedientiam, ut non mittant glossas in regula nec istis verbis, dicendo: Ita volunt intelligi, sed sicut dedit mihi Dominus pure et simpliciter dicere et scribere regulam et ista verba, ita simpliciter et pure sine glossa intelligatis et cum sancta operatione usque in finem observetis. Et quicunque haec observaverit, in coelo repleatur benedictione altissimi Patris coelestis et in terra repleatur benedictione dilecti Filii sui cum sanctissimo Spiritu paracleto et omnibus virtutibus coelorum et omnibus sanctis. Et ego frater Franciscus parvulus et vester servus in Domino, quantumcunque possum, confirmo vobis intus et foris istam sanctissimam benedictionem, amen.

S. FRANCISCI ASSISIATIS

PARS II.