Proph. XVI. Sanctorum meritis multoties Deum a puniendis peccatoribus se coercere.

Famem per totam Italiam grassaturam praedixit semel b. fratri Leoni dicens: " Heu, frater mi, propter peccata populorum mittet Deus magnam famem in mundum, scd propter merita cujusdam pauperis, nescio cujus, qui modo vivit in mundo, hoc flagellum distulit Dominus, sed eo mortuo ita fames haec invalescet, quod innumerabiles homines miserabili egestate peribunt. " Hoc morte instante b. Leoni dixit, sed in monte Alvernae a Christo accepit, quod, ut supra dictum est colloquio 23., se dixit cum aliis sibi revelatis in horam mortis taciturum. Statim ab ejus morte prophetin haec completa est. Nam tanta fames universam pervasit Italiam, ut miseri homines non solum herbis, sed et arborum corticibus pro cibo usi fuerint. Unde et tanta clades secuta est, ut nihil aliud quam mortis imago ubique appareret. Qua debacchante apparuit beatus pater fratri Leoni et se pauperem illum fuisse, propter quem Deus hanc plagam distulit, ostendit.