16. Hymnus alius super eodem.

1. Tu es vere, recte sanctus,
Puram docens veritatem,
Tu suavis Dei cantus,
Praebes tu iucunditatem,
Tu spiritus paraclitus
Lucis ferens claritatem.

2. Tu munda nos tristitia
A praesentique futura,
Iucunda nos laetitia,
Quae sit semper duratura,
Moremur in munditia,
Anima sit laetatura.

3. Tu hominem illuminas,
Ipsum reddis reformatum
Tuque hominem transformas,
Facis eum ordinatum,
Pro virtutibus expugnas,
Facis hominem laetatum.

4. Iam cessat quis a vitiis,
Cum est in sancto spiritu,
Et, si est in eius viis,
Iam caret quis interitu,
Quod non adhaeret impiis,
Iam non gravatur gemitu.

5. Tu piusque misericors,
Tu miserator[que] clemens
Et tu vero sancta cohors,
Tu veni, sis nos protegens,
Tu facito nos liberos,
Veni, protector diligens.

6, Tu confortator pauperum,
Tu nos reducas devios,
Tu es sanator vulnerum,
Tu fidos salvas populos,
Tu luminator cordium,
Tu redde nos benevolos.

7. Quem facit sanctus spiritus
Ad amorem inflammare
Et facit quem divinitus
Ad virtutem reformare,
Confortat quem in melius
Et quem facit regulare.

8. Tu homines pacificas
Et exstinguis certe lites,
Tu homines vivificas,
Facis humilesque mites,
Tu homines glorificas
Et [his] reddis bonos fines.

9. Tu pellis cuncta odia,
Nutris amorem proximi,
Tu reples fidos gratia,
Es virtus tu sanctissimi,
Tu nos corona gloria
In regno potentissimi.