16. "In die sancto Paschae."

1 a. Hac sacrosancta die

Deum laudent ecclesiae;

1b. Haec dies laetitiae,
Dies Christi victoriae.

2 a. Natus Mariae

Pro nobis passus pridie
Surrexit hodie ;

2 b. Rex clementiae

Vicit regem superbiae
Via prudentiae.

3 a. David desiderabilis,

Fastum prosternens Goliae,
Redit victor laudabilis
Ferens salutem patriae.

3 b. Christus, in quem desiderat
Omnis sanctus prospicere,
Suos ab hoste liberat
Victor surgens de funere.

4 a. Dic nobis, Maria,
Magdalene dicta,

4b. In conscientia,

Sunt vera praedicta?

5 a. In conscientia,
Vera sunt omnia ;

5 b. Experientia
Removit dubia ;

6 a. Vidi, vidit Petrus,
Omnes apostoli,

6 b. Ioseph et Iacobus,

Testes sunt angeli.

7 a. Sed Thomas dubius
Probavit certius
Palpans interius
Vulnera.

7 b. Virtus ascendentis
Firmat, nunc sedentis
In omnipotentis
Dextera.

8 a. Hoc tenet firmiter
Fides catholica,

8 b. Per Christum iugiter
Quae sit pacifica.