17. Ad Deum Oratio.

O princeps pacis ac principium pietatis,
O verum lumen, retinens par cum patre numen,
Spiritus o sancte, quo constant cuncta volente,
His quoque personis unus semper specularis,
Ordine qui miro finis constas et origo
Leges aeternas ac solus iure gubernas,
Qui genus humanum miseratus mortificatum
Vivere fecisti pretioso sanguine Christi,
Cuius iudicio statuentur cuncta sub aequo,
Da sentire fidem, qua felix fert sibi finem,
Ut credam recte, nec sint aliae mihi sectae,
Atque sciam plane, quod iustum sit vel inane.
Spem concede mihi, qua possit vita videri;
Virtus in his prima restat dilectio bina,
Quam, Deus, infunde sub viscera cordis abunde.
Aures adverte, rogo, sint mihi semper apertae,
Ne reminiscaris delicta mei puerilis,
Sed pius ignosce factis veniamque repende.
Non mea mens, quaeso, laedatur more superbo,
Adveniat rite custos patientia vitae,

Mor? et perditio discedat, caeca libido,
Nunquam deliciis confundar crimine ventris,
Ne polluta caro somno turbetur amaro.
Obsecro, me frenas, cum videro res alienas,
Sint procul invidia, iactantia, lis, sed et ira,
Nec rebus vanis me laus seducat inanis.
Fructificaque, mihi quaecunque talenta dedisti,
Sicque meos mores, Deus, immutato decores,
Ut mea sit cura, quod gestat vita futura,
Ac regis veri merear sodalis haberi,
Qui sancto tecum cum flamine regnat in aevum.

1S. De Spiritu Sancto.

1. Veni, persona tertia,

De sede trinitatis,

Gratifica nos gratia,

Largire dona gratis;
Nostra mala submoveas,
Nostrae defectum suppleas
Internae paupertatis.

2. Patris, nati concordia,
Fac nos tibi concordes
Et Deo reconcilia

Per peccata discordes;
Dator verae munditiae,
Manu misericordiae

Nostras emunda sordes.

3. Tu spiritus paraclitus,
Tu verus consolator,
Mentis lustrator subitus

Et dulcis inflammato;
Tu increata caritas,
Tu dapsilis benignitas,
Mundi sanctificator.

4. Tu donum donans omnia,
Tu amor, fons amorum,
Tu celebris laetitia,

Thesaurus gaudiorum,
Audacia, facundia,
Virtus et eloquentia,
Magister saeculorum.

5. Per te prophetae praesciunt
Et nuntiant ventura,
Apostoli subiciunt

Orbem et orbis iura;
Tu virgines sanctificas,
Tu martyres fortificas
In corporum pressura.

6. Tu pascis in pastoribus
Greges fideli cura
Et doces in doctoribus,

Quaecunque sunt obscura,
Tu solis te consocias,
Desertum in delicias
Vertis et mollis dura.

7. Per te nati renascimur,
Renati consummamur,
Perenni cibo pascimur,
Charactere signamur,
A vinculis absolvimur,
Aeterno sponso iungimur,
Verissime sanamur.

8. Tu das gustum dulcedinis,
Intellectum, splendorem,
Consultae fortitudinis
Tu tribuis vigorem,
Tu clausum librum aperis
Et pietatem suggeris
Et ingeris timorem.

9. Ergo, caelestis unctio,
Nos ungere dignare,
Da sacro septenario
Devotos abundare,
Jacentes in exsilio
Frequenti beneficio
Sis memor visitare.

10. O benigne paraclite
Lugentes consolare,
Te mereamur hospite

Post fletum exsultare,
Per te de carne, saeculo
Atque salutis aemulo
Possimus triumphare.