Tertia Quinquagena.

1. Ave, Iesu, qui temporis
In fine nostri corporis

Assumptam imaginem
Transtulisti ad sidera,
Supernis monstrans vulnera

Assumpta propter hominem.

2. Ave, supremum gaudium,
Qui nostrum desiderium

Sanas in hominibus,
Tu, Deus, es refugium
Ministrans adiutorium
In te confidentibus.

3. Ave, Iesu, qui spiritum
De sublimi paraclitum

Transmittis hominibus,
Olim linguas divisisti,
Has in unam collegisti
Ultimis temporibus.

4. Ave, petra, de qua manat
Medicamen, quod nos sanat

In oboedientia,
Super petram hanc fundata
Nostra mater benedicta

Noscitur ecclesia.

5. Ave, Iesu, dux omnium,
Flos et decus regnantium,

Quo reguntur omnia,
Te victimam obtulisti
Patri mundam, quod fecisti

Per crucis supplicia.

6. Ave, qui sitientibus
Potum, esurientibus

Escam das et avibus,
Summae Sion civitatem
Tuis confer, claritatem

Eius dona fratribus.

7. Ave, Iesu, meum para
Cor et renes, ut in ara

Crucis Dei filium
Te cognoscam cum amore,
Tuo mercer et honore
Cursus tui bravium.

8. Ave, cuius ieiunium
Nostrum fuit remedium

Nostraque refectio,
Nos pupilli sine patre
Degimus, non sine matre
Sub tuo dominio.

9. Ave, praesul et victima,
Peccati per quem anima

Solvitur a maculis,
Ad dextram patris resides,
Cunctos excellens praesides
Auri cinctus cingulis.

10. Ave, patris prudentia,
Contra quem sapientia

Humana nihil proficit,
Duc nos regens ad gaudia,
Ducat, ubi spurcitia

Foeda nullum pellicit.

11. Ave, lumen de lumine,
De patre, sed non homine,

Natum ante saecula,
Demum in fine temporis
In forma nostri corporis

De matre virguncula.

12. Ave, nomen benedictum,
Quod abolet maledictum

Primis datum patribus,
Illud nomen mutat mores,
Ornat suos amatores

Optimis virtutibus.

13. Ave, Iesu, lator legis,
Qui superna potens regis,

Salva nos a barbaris.
Educ nos de miseria,
Qua tenemur, et copia

Tui reple nectaris.

14. Ave, bonus Samarita,
Mundi custos, mundi vita,

Mundi reparatio,
Fac parvulos sine dolo
Nos degentes in hoc solo
Gratos tuo solio.

15. Ave, qui culpae silicem
Per passionis calicem

Ad nihilum redigis,
Ego mendax et impius,
Sed tu verax et serius,

Corrige, quae diligis.

16. Ave, dignus omni laude,
Mitis, clemens sine fraude,

Qui fracta consolidas,
Nos caelestis custodia
Protegat, ne inertia
Mentes reddat sordidas.

17. Ave, Iesu, lapis fortis,
Qui conteris portas mortis

Et magias Simonis,
Hoc lapide liberamur,
Qui Christus est, et armamur

Contra vires daemonis.

18. Ave, qui rex omnium,
Finis es et principium,

Divina substantia,
Qui quaerunt te, benedicti,
E diverso maledicti,

Qui sectantur noxia.

19. Ave, per quem erigimur,
Per quem stantes eripimur

Gehennae incendio,
Carbone sancti spiritus
Accende nos divinitus

Purgans nos a vitio.

20. Ave, Iesu, qui non dormis,
Licet nobis sis conformis

Pro salute Israel,
Nostrum servet introitum,
Praestoletur et exitum

Missus a te Michael.

21. Ave, pax indeficiens,
Turris, qui tuos muniens

Contra carnis vitia,
Hanc da nobis sine mora,
Ut proxima mortis hora
Sis muneris gloria.

22. Ave, qui caelos habitas,
Humilis et humilitas

Et virtutum Domine,
Ad te levamus oculos
Hymnos reddimus sedulos,

Ut ancillae dominae.

23. Ave, Iesu, nos intende
Nostro curam et impende

Medicando vulneri,
Tu laqueos mortiferos
Evasistique inferos

Comparatus passeri.

24. Ave, Iesu, corripiens
Virga, nefandos puniens,

Iram seda populi,
Ne relinquas peccatorum
Virgam super sortem horum,

Qui tui sunt famuli.

25. Ave, cuius auxilio,
Spirituali gaudio

Replemur et gloria,
Da, ut per quae seminamus
Te donante capiamus

Aeterna remedia.

26. Ave, custos civitatis
Summae Sion, tribulatis

Corde da laetitiam,
Ne in vanum laboremus
Vel de mane vigilemus

Te rogantes veniam.

27. Ave, Iesu, vir beate,
Castus timor nobis a te

Permanens in saeculum,
Adveniat, qui nos regat,
Ne in nobis amor degat

Mentis turbans oculum.

28. Ave, Iesu, par homini
Glorificantes nomini

Tuo benedicimus,
Tu cervices peccatorum
Caedas iustus impiorum,

Piorum piissimus.

29. Ave, misericordia,
Flagitiorum venia,

Multiplex remissio,
De profundis me clamantem
Et pro posse deprecantem

Tuo iunge solio.

30. Ave, cuius cor elatum
Non est sed humiliatum

Excelsis aspectibus,
Tuis siste me curatum,
A sordibus emundatum,

Atque patris vultibus.

31. Ave, dulcis alvi fructus,
Per quem finem sumit luctus

Humanae miseriae,
Super thronum resedisti
David, cum te induisti

Stola pudicitiae.

32. Ave, Iesu, quam bonum est
Te laudare, quam sanctum est

Fratres in te vivere,
Tu balneum, quo lavatur,
Et unguentum, quo sanatur,

Quidquid est in vulnere.

33. Ave, decus dominorum,
Qui facis velle tuorum

Te glorificantium,
Extollimus cotidie
Manus ad te meridie,
Nocte, lumen noctium.

34. Ave, vivens in aeternum,
Iesu, nomen sempiternum

A patre susciperis,
Ne iudices ut damnatos
Nos, sed nutri ut salvatos

In pace recipiens.

35. Ave, potus et pabulum,
Quod consolatur populum

Defectum inedia,
Solem, lunam tu fundasti,
Universa tu creasti

In terris viventia.

36. Ave, lumen nectareum,
Iubar fundens aethereum,

Illuminans hominem,
Praesta, ne simus silices,
Ut infecundae salices

In sanctorum ordinem.

37. Ave, Iesu, cui merito
Inclinamur ut inclito

Et factori omnium,
Cum sanctorum virtutibus
In organis et vocibus

Te laudamus filium.

38. Ave, cuius scientia
Mirabilis, potentia

Potens et terribilis,
De sepulcro surrexisti,
Quo devicta iacuisti

Morte,- victor nobilis.

39. Ave, beata pietas,

Adversum quem impietas

Linguam suam acuit,
Erue me de pedica
Malignorum inimica,

Quae fraus tuis posuit.

40. Ave, salus pacifica,
Virga mitis, thurifica
Pertransiens omnia,
Odore cuius mortui
Reviviscunt et in tui
Assistunt praesentia.

41. Ave, fidelis portio,
Defende nos in proelio

Futuri examinis,
Ne peccata respicias
Vel laesas conscientias,

Qui rector es hominis.

42. Ave, via gloriosa,

Quam despicit frontuosa

Turba malignantium,
Precor, ut spiritum meum
Ducas per spiritum sanctum

Ad caeli fastigium.

43. Ave, cuius digiti
Potestates dispositi

Debellant aereas,
Subde nobis malignantes
Atque tuos impugnantes

Turbas adversarias.

44. Ave, mitis universis,
Ut amicis sic aversis

Spondes indulgentiam,
Ex corde si paeniteant
Et a malis abstineant

Deprecantes veniam.

45. Ave, clavis carceralis,
Libera nos, ne poenalis

Tartarus absorbeat,
Qui promittit, ut avertat,
Insequitur, ut pervertat,

Instigat, ut teneat.

46. Ave, Iesu, qui numeras
Stellas solus innumeras

Divina scientia,
Harum solus cognovisti
Cursus, loca, quas fecisti,

Cum patris essentia.

47. Ave, porta deaurata,
In ascia non dolata
Nec lita bitumine,
Per te decus castitatis
Floreat integritatis
Meo flos in homine.

48. Ave, rex, qui caelcstium
Voce laudaris omnium

Nec non et terrestrium,
Nam amovisti rompheam
A porta caeli flammeam

Mittens in exsilium.

49. Ave, quem chordis, organo
Una cordis cum tympano

Collaudat ecclesia,
Tua nobis memoria
Sit ad praesens laetitia

Et merces in patria.

50. Ave, virtus eximia,
Columna portans omnia,

Caelica, terrestria,
Illustra nostras caelitus
Mentes, ut omnis spiritus

Te laudet per saecula.