19. De s. Cypriano Tolonensi.

Ad Vesperas.
Antiphonae.

1. Adest dies laetitiae,
Patent caeli palatia,
Doctori novae gratiae
Nova confertur gloria.

2. Carnis liber ergastulo

Iam cum pastoris mercede
Caeli potitur pabulo
Clarusque doctoris sede.

3. Vivens refulget gratia,
Bina post finem laboris
Congaudet sanctus gloria
Vitae simul et honoris.

4. O pater sancte, filiis
Confer benedictionem,
Salutem nobis impetra,
Gratiae plenitudinem.

5. Consors caeli spirituum,
Pie pater miserorum,
Te nunc vota precantium
Iusta suscipe tuorum.

Ad Magnificat.

A. O pastor egregie,

Doctor veritatis,
Tu norma iustitiae,

Iudex aequitatis,
Speculum munditiae.

Custos sanctitatis,
Nos ad regnum gloriae

Deduc cum beatis.

In 1. Nocturno.
Antiphonae.

1. Cyprianus, vir optimus,
In Christo fidelissimus,
Caesarii discipulus
Fit, comes individuus.
Eiusque servat monita.

2. Plebs Tolonensis humilis
Nunc puro corde et supplici
Te precatur et obsecrat,
Ut te patronum habeat
Et vim precantis sentiat.

3. Clemens pater, filiis
Da salutem miseris
Et obtine virtutem
Resistendi vitiis.

Responsoria.

1. Sub magno patre militat
Caesario vir optimus
Et animo sanctissimus
Eius sequendo semitas.
V. Tanti patris

doctus colloquio
Sacri verbi

fulget eloquio
Tamquam lumen

non tectum modio.

2. Semen verbi, quod messuit,
Post sparsit abundantius
Et mercede, quam meruit,
Iam fruitur felicius.
V. Post labores requiem
Possidet in caelis,
Dei cernens faciem
Servus tam fidelis.

3. Dum caelorum

scandisti culmina
Post devicta

mundi certamina,
Laeta currunt

sanctorum agmina,
Modulantur

dulcia carmina.
V. O senator

caelestis curiae,
Memor esto

tuae familiae.

Ad Benedictus.

A. Mentis fulgor,

carnis nobilitas,
Decus morum

et ingenuitas,
Lux doctrinae,

pastoris aequitas
Ornant iustum

et mira caritas.

Ad Magnificat.

A. Ortum solem

divinae gratiae,
Munus datum

urbi Tolonicae,
Cyprianum

laudat plebs humilis
Et Deum o-

rat mente supplici.