LIBER SAPIENTIAE.

Diligite iustitiam, qui iudicatis terram .

Beatissima Domina dicitur mater instructionis peccatorum stultorum, Sapient. VII, 12: Ignorabam, ego scilicet peccator, quoniam horum omnium, scilicet fidelium Christi, mater est sapientia, scilicet Maria,

Item, Ipsa est speculum bonitatis Dei, et speculum imitationis. Sapient. VII, 26 : Candor est lucis aeternae, et speculum sine macula Glossa : Etiam venialis peccati, et imago bonitatis illius, scilicet Dei.

Item, Ipsa est unctrix Dei et hominis, quae attingit a fine misericordiarum Dei, usque ad finem miseriarum hominis peccatoris. Sapient. VIII, 1 : Sapientia attingit a fine usque ad finem fortiter, etc.

Item, Ipsa est mater communicationis

omnium bonorum : et mater consolationis, taedium auferens per piam consolationem., et allocutionem sapientiae. Sapient. viii, 9 : Proposui ergo hanc, scilicet Mariam, adducere mihi ad convivendum per devotionem, ipsam ad me venire invitatis: sciens quoniam mecum communicabit largiter, fideliter, et humiliter, et utiliter de bonis gratiae et gloriae, et erit allocutio cogitationis et taedii mei, Glossa: Allocutio, idest, alleviatio.