Secunda Quinquagena.

1. Iesu, qui malitiam

Doech reprehendis

Atque innocentiam

David hic ostendis,

A malis detractoribus,

qui apud praesidentes

Nos iniuste lacerant,

salva innocentes.

2. Iesu mi, qui Iudaeos

per regnum Graecorum

Afflixisti plurimum,

sed Maccabaeorum

Auxilio sublevas,

in malis obstinatos

Puni et salva tibi

servire paratos.

3. Iesu, qui dum Ziphei

ad Saul vadunt regem

Volentesque tradere

David et eius gregem,

Eos salvas, quaesumus,

contra accusatores

Defende nos ac pessimos

quosque delatores.

i. Iesu, cuius gratia

David est salvatus,

Dum fugit a Ceyla

a Saul liberatus,

Audi preces supplicum,

qui te pie quaerunt

In tribulationibus,

qui se invenerunt.

5. Iesu, David redimens

ad regem Achis ductum,

Dum est in periculo,

auferendo luctum,

Timidos nos aspice

oculis attentis,

Procul pelle tenebras

timorosae mentis.

6. Iesu, qui, dum speluncam

ad purgandum ventrem

Saul intrat, custodis

David innocentem,

Quaelibet temptatio

abscedat velut fumus,

In mortis dum periculo

constituti sumus.

7. Iesu, qui sic perficis

David mentem castam,

Inimicum perdere

cum posset, parat hastam,

Tamen et aquae scyphum

in signum huius rei

Servat, tu me similem

fac misertus mei.

8. Iesu, qui salvas David

in domum fugientem

Per Michol per fenestram

eum deponentem,

Hostes nostros contere,

qui nobis nocere

Cupiunt, et dabimus

grates tibi vere.

9. Iesu, qui Israelis

regnum lacerari

Sinis, per Philistaeos

ad tempusque vastari,

Et paenitentes liberas,

a via nos erroris

Revocans ad statum duc

vitae melioris.

10. Iesu, David liberans

a Saul, dum sic erat

Anctus, quod evadere

posse se desperat,

Pro quo agit gratias,

fac nos quoque gratos

A quovis periculo

a te liberatos.

11. Iesu, de terra Moab

in Iuda revertentem

Regem David faciens

in te confidentem,

Nostra in te sita sit

spei certitudo,

Cuius est dulcedinis

magna multitudo.

12. Iesu, quem laudat David

pro consolatione,

A te sibi reddita

in persecutione

Saul regis pessimi,

nobis hoc solamen

Dona, pacem perditam

restaurando, Amen.

13. Iesu, qui Danielem

suasu malignorum

In lacum missum leonum

salvasti eorum

Ora claudens per angelum,

hos, qui nos offendunt

Iniuste, fac, ut incidant

laqueos, quos tendunt.

14. Iesu, Babylonicae

qui captivitatis

Hic prophetas reditum

per David pulchre satis,

Nos per paenitentiam

fac ad te redire,

Ut non semper filii

maneamus irae.

15. Iesu, Aegyptiaca

de captivitate

Israelem liberans,

pro quo hic laudat te,

Nos captos a daemone

ob nostra peccata

Paenitentes libera

gratia donata.

16. Iesu, qui per prophetam

de incarnatione

Et tua inter homines

conversatione

Praedicis et mysterium

sanctae trinitatis,

Miserere miseris

spem dans desperatis.

17. Jesu, qui scandens caelum

post resurrectionem

Promisisti spiritus

sancti missionem

Hic, ut ad Ephesios

apostolus ostendit,

Perduc nos ad superos,

quo mens nostra tendit.

18. Iesu, qui Iudaeorum

de punitione

Per David hic loqueris

et tua passione,

Qui et tuam cantico

magnificat laudem,

Vincere nos facias

malignorum fraudem.

19. Iesu, qui huius psalmi

principium cantari

In horis praevideras

per David liberari

Petentem a periculis,

nostrae spes saluti

Sis, cum iugo premimur

dirae servitutis.

20. Iesu, sicut David rex

allegat rationes

Plures gratiarumque

reddit actiones,

Ut salvus in periculis

sit, sic nobis dona

Grates tibi reddere

mente semper bona.

21. Iesu, cui deferunt

tres ab oriente

Magi tria munera

stella praecedente,

Fac nos sic dispositos

gratia donata,

Ut et nostra munera

fiant tibi grata.

22. Iesu, providentia

ab Asaph hic ostensa

A fine est et ad fines

fortiter extensa

Disponentis omnia

recte tam malorum

Quoad poenam, etiam

praemium bonorum.

23. Iesu, Babylonica

de captivitate

Liberandum populum

Asaph petit a te,

Quaeso, pie Domine,

ut non captivari

Sinas nos nec daemonis

dolo defraudari.

24. Iesu, cui reversi

de captivitate

Et, quod adversariis

poenae sunt illatae,

Multi grates referunt,

sic cum paenitemus,

A peccatis libera,

fac, ut gratis demus.

25. Iesu, a Senacherib

Iudam afflixisti,

Quem confusibiliter

expost occidisti,

Pro quo laudes plurimae

dantur in hoc psalmo,

Sic nos doce facere

tibi Deo almo.

26. Iesu, qui praevideras

per Asaph futuram

Fore Babylonicam

captivitatem duram

Pro orationeque

bonorum finiendam,

Pro culpis quando patimur,

tribue emendam.

27. Iesu, regnum Israel

ostendens pertinere

Ad David et minime

ad Ephraim debere,

Nam non Effrem, sed Iuda

tribum elegisti,

Iudam confidentes fac

nos, quos dilexisti.

28. Iesu, qui Ierusalem

prophetico more

Per Nabuchodonosor

destruendam fore

Praedicis et per circum

reaedificandam,

Nostram lapsam animam

dona restaurandam.

29. Iesu, tuam vineam

qui per te visitasti

Et ab idolatria

liberans plantasti,

De caelo respiciens

a culpa nos converte

A pravisque aspectibus

oculos averte.

30. Iesu, iubens agere

pro fructibus collectis

Grates, prout facere

videmus a rectis,

Quaesumus, nos refice

adipe frumenti

Et de petra satia

melle profluenti.

31. Iesu, qui nequitiam,

iudicum malorum

Synagoga arguis

cum stas in deorum,

Nos pusillos refove

tu, spes egenorum,

Et adoptans elige

spem in filiorum.

32. Iesu, quem rogat Asaph,

ut hostes ludaeorum

Digne pro nequitia

punias eorum,

Nos a malis eripe,

qui impugnant fidem,

Si nescimus aliud,

grates damus quidem.

33. Iesu, tabernaculum

caeleste concupisti,

Docens hic et qualiter

possit adipisci,

Solve, quaeso, vinculum

nostrae pravitatis

Perducens ad gloriam

tuae claritatis.

34. Iesu, qui hic gratias

pro per te fiendis

Liberationibus

agendas ostendis

Et tuae mysterium

incarnationis,

Funde in nos gratiam

benedictionis.

35. Iesu, quem hic iterum

in persecutione

Saulis rogat David

pro liberatione,

Nos a malis eripe,

qui nos persequntur,

Grates non immerito

tibi tunc dicuntur.

36. Iesu, qui ecclesiae

statum militantis

Hic per Core filios

Atque triumphantis

Describis, nos in Sion

montem duc supernum,

Ubi tibi gloriam

demus in aeternum.

37. Iesu, cuius passio

hic denuntiata

Spiritu prophetico

estque prophetata,

Qui pro nobis moriens

spolias infernum,

Solium nos facias

scandere supernum.

38. Iesu, qui regnum David

vis perpetuari,

Non in eo, sed in te

iube nobis dari

Gratiam divinitus,

ut semper intenti

Tuis simus laudibus

post et in praesenti.

39. Iesu, cui Moyses

grates magna cura

Dat pro beneficiis,

ut impetretque plura,

Preces tibi porrigit,

per te dirigatur

Nostra sic oratio,

ut exaudiatur.

40. Iesu, tuum populum

protegens electum

A daemone et homine

malo et deiectum

Habens adversarium,

libera, rex pie,

Nos a verbo aspero

in extremo die.

41. Iesu, in hoc cantico

ostendens promovendos

Gratos, e contrario

ingratos puniendos,

Doce nos, ut gratias

devotas agamus

Servitutis nostraeque

pensum persolvamus.

42. Iesu, qui regni tui

inchoationem

Hic describis et eius

impugnationem

Confirmationemque

miracula per multa,

Unde et valde mirum est,

quod gens non credit stulta.

43. Iesu, providentiam

quod ad actus humanos

Habes, ostendis in hoc,

quod punis profanos,

Nos astare facias

laetos ante thronum,

Cum in fine veneris

Deus ultionum.

44. Iesu, quia Domino

hic ad iubilandum

Plebem inducit David

eumque laudandum,

Illud nobis, quaesumus,

virgo, mater Dei,

Impetret a filio,

ut iubilemus ei.

45. Iesu, qui hic canticum

novum decantare

Iubes atque gloriam

tuam nuntiare,

Iuris et iudicii

fervidum rigorem

Per misericordiae

tempera dulcorem.

46. Iesu, qui dominicum

tuum descripisti

Adventum ad iudicium,

hic non praeteristi,

Tandem cum advenerit

illa dies irae,

Nos ad tuam dexteram

praecipe venire.

47. Iesu, quem Deus pater

salutare notum

Fecit, cum, quod hominis

erat, sumis totum,

Cum in fine veneris

orbem iudicare,

Non hoedis nos sed ovibus

velis adgregare.

48. Iesu, de cuius regno

Iudaei irati

Ita, quod id crebri sunt

destruere conati,

Sed quod non fit, catholici

hinc ad Dei laudem

Inducti sunt, da vincere

perfidorum fraudem.

49. Iesu, qui in iubilo

tibi decantare

Ac pro beneficiis

vis regratiari,

Dona, ut in gaudio

devote te laudemus

Et peccatorum vulnera

semper deploremus.

50. Iesu, sicut David rex

firmatus in throno

Potestate regia

usus est in bono,

Sic nostris da principibus,

ut erga te devotos

Et iustos se ad proximos

exhibeant totos.