20. Hymnus de sacramento seu corpore et sanguine Christi.

1. O Deus tu sanctissime,
Tu totus amor, caritas,
O potens, potentissime,
Tu verus, vera veritas,
O clemens, clemtissime,
Tu pius, summa pietas,
O clareque clarissime ;
Tu lumen, luxque claritas,
O liberator optime,
Tu es medela, sanitas,
O largeque largissime,
Tu liberalis largitas,
O Deus nobilissime,
Amoris es immensitas.

2. Misisti tuum filium,

Nam de caelo qui descendit,
Radicem, fructum, lilium,
Carnem nostram hic suscepit ;
Absumpsit ipse proelium,
Se quidem morti praebuit
Iam pro salute omnium
Nosque sanguine redemit,
Reduxit nos ad praemium,
A quo daemon nos deiecit,
Paravit hic convivium,
In quo sancte nos refecit,
Id nobis salutiferum,
Quod perfectum Deus fecit.

3. Passionem cum speravit
Ac tempus amarissimum,
Servos suos convocavit
Ad cenam seu prandium,
Pedes horum hic lavavit.
Dans illis pacis osculum
Ac in cibum se donavit
Et sanguinem in poculum,
Nostram vitam reparavit
Per hoc sacratissimum,
Iesus Christusque mandavit
Memoriam per saeculum ;
Hic nos certe luminavit,
[Quem] videmus per speculum.