23. Super Pater Noster.

1. Pater, qui es ingenitus,

Iesu, fili beate,
Noster director, spiritus,

Tu nos exaudi grate,
Qui Deus exstas praeditus.

Unus in trinitate.

2. Es vita et veiitas
Et esse aeternale,

In te manet immensitas,
Principium causale,

Caelis, in quibus habitas,
Das lumen radiale.

3. Sanctificetur nobile,
Salubre, gratiosum,

Nomen, quam admirabile,
Quam summe gloriosum,

Tuum, quod est laudabile,
Prae cunctis virtuosum.

4. Adveniat perpetuum
In nos possessione

Regnum caeli praecipuum
Cum tui visione

Tuum, quod est mellifluum
Manans fruitione.

5. Fiat mente gratuita

Et diligenti cura
Voluntas, per quam condita

Est omnis creatura,
Tua decens et licita,

Quae legam est mensura.

6. Sicut es per essentiam
Omnis fons bonitatis,

In caelo sanctis gloriam
Praebes felicitatis,

Et in terra da gratiam
Firmae stabilitatis.

7. Panem caelestem influe

Nobis sacramentalem

Nostrum, dona largiflue

Panem verbi mentalem,
Cotidianum tribue
Panem materialem.

8. Da, Deus, efficaciter,
Da carnis sanitatem,

Nobis praebe benigniter
Mentis tranquillitatem,

Hodie et perenniter
Da vitae sanctitatem.

9. Et dimitte fidelibus
Reatus et peccata,

Nobis transgressoribus
Dominica mandata

Dedita paenitentibus
Remitte perpetrata.

10. Nostra dissolve scelera,
Morbos cunctos averte,

Sicut das cuncta munera,
Sic nos ad te converte

Et nos transfer ad sidera
Te visuros aperte.

11. Dimittimus errantibus

Offensam et gravamen

Debitoribus omnibus
Praestante te iuvamen,

Nostris ut dones mentibus
Salutis medicamen.

12. Et ne nos per contagium
Quodcumque vitiorum

Inducas in excidium,
Fer opem, rex caelorum,

Temptationem hostium
Repelle malignorum.

13. Sed tu, pater, per filium
Iesum tam benedictum

Libera dans auxilium
Et mitiga conflictum,

Nos salva premens noxium
Serpentem maledictum.

14. A poenis, Deus, penitus
Nos stude liberare,

Malo propulso funditus
Nos, Christe, consolare,

Amen ut semper caelitus
Possimus te laudare.