22. De Plagis Domini.

1. Ave, nate Dei vivi,

De quo quinque fluunt rivi
Pretiosi sanguinis
Pro salute hominis.

2. Ave, caput salvatoris,

Gestans sertum, proh, doloris,
Per quod dire terebratum
Exstat cerebrum beatum.

3. Ave, vulnus dextrae manus,
Per quod nostrae culpae hamus
Est disruptus, quem in pomo
Primus deglutivit homo.

4. Ave, vulnus manus levae,
Per quod scholam lucis aevae
Nobis, Christe, ostendisti,
Dum te figi permisisti.

5. Ave, vulnus cordiale,
Per quod ens primordiale
Vitae nostrae tersit luctum
Et salutis auxit fructum.

6. Ave, vulnus dextri pedis,
Qui nos ad supernae sedis
Viam ducis consolatos
Vera fide solidatos.

7. Ave, vulnus pedis laevi,
Per quod hostes prius saevi
Ruunt, aemulantur rei
Per te donum sanctae spei.

8. Ave corpus Christi laesum
Et pro nobis virgis caesum,
Pallens in tormento mortis,
Salva nos, amator fortis.

9. Ave, sanguis generose,
Qui fluxisti copiose,
Riga, lava et emunda
Corda nostra tam immunda.

10. Per haec, Christe, benedicta
Vulnera tibi inflicta,
Dulcis Jesu, te rogamus,
Fac ut tecum gaudeamus

In futuro saeculo.