35.

1. Sol de sole prodiens
Hostem excaecavit,
Ex alto hic oriens
Nos illuminavit,
Cum a patre veniens
Matrem fecundavit
Deus Dei filius.
2. Deus aeternaliter
Genitus a patre
Nobis temporaliter

Natus est ex matre,
Sic potentialiter
Jugum mortis atrae
Contrivit subtilius.
3. Verae lucis oriens
Jubar adumbravit,
Sed eclipsim nesciens

Nos illuminavit,
Cum pro nobis moriens
Vitam reparavit
Deus Dei filius.

4. Quod tam diu tenuit
Nos mortis vorago,
Nobis hoc promeruit

Infelix virago,
Sed hoc totum diluit
Virginis propago,

Rex supernae gloriae.
5. Fraudulenta vipera
Quem decepit pomo,
Et ob haec a supera
Propulsatum domo,
Natus de puerpera
Deus factus homo
Revocavit hodie.

6. Quod dudum praedixerant
Patres et prophetae,
Quod ipsi promiserant

Insignes poetae,
Quod magi cognoverant
In ortu cometae,

Jam est in propatulo.

7. Nos et nostra saecula
Salvat homo Deus,
Captivorum vincula
Solvit jubilaeus,
Sua perdit jacula
Goliath Getaeus
Nato nobis parvulo.