25. De sancto Aegidio.

1. Sicut passer solitarius

in tecto.

2. Sic vir Aegidius, pervigil

in Christo,

3. Requiescens quasi leo

cum Iuda accubuit,

4. Dum pullum suum ad vineam

ligare studuit.

5. Ut catulus leonis

ascenderat ad praedam

alligans ad vitem

asinam suam,

6. Dum per virtutum scalam

Sorech quaerens vineam

se suamque Christo

iunxerat sponsam.

7. Hic inventus sine macula

nec speravit

in thesauris et pecunia,

8. Ne sibi coluber in via

vel cerastes

nocere posset in semita.

9. Cui per sanctae

trinitatis efficaciam

10. Contulit tantam

meritorum Deus gratiam,

11. Ut miraculorum

coruscans virtutibus

pluribus per ipsum

mederet egentibus.

12, Nam tempore quodam

propter elemosynam

misero cuidam

suam dedit tunicam ;

13. Quam ut aeger idem

induerat,

14. Incolumis inde

redierat.

15. Deinde

relinquens Graeciam

16. Transiit

exsul ad Galliam,

17. Ubi infirmos curavit,

daemoniacos sanavit,

18. Peccatum regis piavit,

mortuum resuscitavit.

19. Munus ab apostolico

Romae sibi contraditum

20. Statim immissum Tiberi

direxit ad coenobium.

21. Hinc nos te, sacer Aegidi,

devotione

rogamus supplici,

22. Quo peccatorum veniam

per tuam nobis

obtineas gratiam,

23. Et Christum laude

frequentemus debita,

24. Cui semper sit

potestas et gloria.